Banorët e Laprakës janë ngritur sërish në protestë pasditen e sotme, ku kanë bllokuar rrugën kryesore përreth 60 minuta. Shkak i këtyre protestave të vazhdueshme, mbetet projekti i ri për ndërtimin e Unazës së Madhe. Ai përfshin një numër të madh godinash të cilat do të shemben në mënyrë që t’i hapet rrugë punimeve. Dëmi që u shkaktohet banorëve është i madh, mund të mbeten në rrugë nëse nuk i jepet zgjidhje, teksa deri më tani, sipas tyre nuk ka pasur asnjë reagim.
Ndër të tjera banorët kanë bërë me dije se protestat do të vijojnë edhe më tej, madje duke paralajmëruar ndonjë përshkallëzim të mundshëm. Banorët kanë bërë me dije se protesta mund të zhvendoset edhe para Bashkisë Tiranë ose Kryeministrisë.
Rruga ka qëndruar e bllokuar përreth 1 orë ku nuk janë lejuar të kalojnë automjetet, apo mjetet e tjera të transportit. Madje këta të fundit janë shfaqur të indinjuar për këtë bllokim, por duke i dhënë të drejtë protestuesve për kauzën e tyre.
