Mbrëmjen e kaluar, rreth orës 22:20, në saunën e një hoteli në Qerret të Kavajës, u gjetën të vdekur 4 turistë rusë që kishin ardhur me pushime në vendin tonë, identiteti i të cilëve u bë i ditur nga mediet ruse.
Turistët që humbën jetën në hotel:
Nataliia Burenkova, 58 vjeçe,
Sergei Burenkov, 60 vjeç,
Nikita Belousov, 37 vjeç
Ekaterina Burenkova, 31 vjeçe
4 turistët rusë kishin prenotuar për të kaluar pushimet në hotel “Gloria” në Qerret, por mbrëmja e 15 tetorit duket se ka qenë fatale për ta. Burime paraprake thanë se 4 turistët rusë, përkatësisht dy gra e dy burra, janë gjetur të pajetë në sauna nga menaxheri i hotelit, rreth orës 22:20, të cilët menjëherë kanë njoftuar ambulancën. Dyshohet se pushuesit rus në hotel mund të kenë qenë nën efektin e alkoolit çka ka sjellë dhe humbjen e jetës.
“Life.ru” teksa dha identitetet e viktimave, shkruajti se ata u gjetën të pajetë nga stafi i hotelit, ndërkohë që dyshohet se janë asfiksuar. Madje mësohet se ngjarja në fjalë i është përcjellë edhe ambasadës ruse në Tiranë.
Aktualisht policia po heton rreth ngjarjes në fjalë dhe zbardhjes së plotë të shkaqeve.
