Dy të rinj kanë rënë në pranga ditën e sotme, pasi iu janë gjetur 5 kg drogë në makinë. Ndërsa bëhet me dije se janë shpallur në kërkim dhe dy të tjerë. Sipas informacioneve, në pranga kanë rënë A.B., 30 vjeç, banues në fshatin Çerrice, Çorovodë, dhe M.D., 31 vjeç, banues në fshatin Zhepe, Çorovodë.
Si dhe u shpallën në kërkim shtetasit M.H 22 vjeç dhe S.Q 23 vjeç, banues në Gramsh, ku vijon puna për kapjen e tyre.
Arrestimi dhe shpallja në kërkim e këtyre shtetasve u bë pasi në aksin rrugor Gramsh-Tunjë, gjatë kontrollit të automjeteve , shërbimet e Policisë kanë gjetur dhe sekuestruar në cilësinë e provës materiale 5 kilogramë lëndë narkotike kanabis sativa. Gjithashtu, janë sekuestruar 3 automjete dhe 2 telefona celular.
Materialet iu referuan për veprime të mëtejshme, Prokurorisë së Rrethit Gjyqësor Elbasan, për veprën penale , “Prodhimi dhe shitja e lëndëve narkotike”, kryer në bashkëpunim.
