Në përvjetorin e Fondacionit Gjerman “Friedrich Ebert” në Shqipëri, kryeministri Edi Rama foli për procesin e hapjes së negociatave me Bashkimin Europian dhe Ballkanin e Hapur.
Për integrimin në BE ai tha se i vjen keq që për kaq vite vazhdojmë të jemi vend kandidat, madje mes shkas e ironisë tha se mund të quhemi “dhëndër në tentative” për në BE. Gjithsesi, sipas tij edhe pak kohë ka mbetur për të mbërritur aty ku dëshirojmë. Rama tha se, Shqipëria duhet të bëjë akoma më shumë dhe të ketë në fokus integrimin.
“Dëshiroj ta them, që për ne kjo ka qenë një periudhë në një farë mënyrë maturimi dhe kuptimi më i drejtë dhe më i plotë i këtij procesi dhe i vetë natyrës kontradiktore dhe të paparashikueshme të procesit. Është e qartë me këtë shpërthimin e papritur së fundmi të problemit të Bullgarisë. Ky është një proces ku nuk duhet ta humbim fokusin nga fakti që jemi në këtë proces jo se na e kanë imponuar të tjerët, por që e ka zgjedhur populli vetë për t’u bërë pjesë me të drejta të plota e familjes së bashkuar europiane.
Duke mbajtur këtë parasysh duhet të vazhdojmë të bëjmë edhe më shumë se kemi bërë. Të bëjmë më shumë se bëmë dje, pavarësisht se çfarë vendimesh merren në Bruksel, apo stër-stër kushtesh shfaqen deri në Bullgari. Këto janë të ndara me njëra tjetrën. Nuk e di si quhemi tani sepse u bë disa vite që jemi kandidat. Dhëndër në tentativë të familje europiane”, tha ai.
Sa i përket çështjes së “Ballkanit” të hapur, Rama u shpreh se nuk ka ndërmend të marrë për bazë kundërshtitë ndaj kësaj nisme. Sipas tij është marrë hapi i duhur që i vjen në ndihmë dhe rrit Ballkanin. Madje ai u shpreh i bindur se me kalimin e kohës do t’i bashkohen edhe vende që e kundërshtojnë sot.
“Jam i bindur dhe nuk e vë në dyshim që Ballkani i Hapur është ideja e duhur në kohën e duhur. Të gjithë do e përqafojnë hap pas hapi, Nuk kemi kohë për të humbur. Duhet të hapemi plotësisht me njëri tjetrin për të krijuar një shëmbëlltyrë e asaj që duam të jemi. Kështu fitojmë kohë nga e ardhmja., Ballkanin e Hapur do e bëjmë dhe nuk do kemi asnjë rrugë tjetër kur të hyjmë në BE. Duke e bërë sot dhe duke e bërë me bindje, ne jo vetëm që ndërtojmë një hapësirë funksionale të katër lirive të BE, por i japim vetes mundësinë për të rritur ekonominë tonë. Asnjë vend nuk e ka luksin të merret me politikën në plan të parë për arsye politike të brendshme”, u shpreh Rama.
Ballkani i Hapu është kundërshtuar më së shumti nga Kosova. Për kryeministrin Albin Kurti kjo nismë është në favor të Serbisë prandaj ai nuk do ta pranojë kurrë.
