Ditën e sotme është kryer përurimi i rrugës “Remzi Hoxha” në Shkup në përkujtim të zhdukjes misterioze të tij me 21 tetor 1995. Për të treguar më tepër rreth këtij organizimi, ka folur djali i tij, Ardian Hoxha, i cili tha se këto nuk janë të mjaftueshme, por ai kërkon me doemos eshtrat e babit.
Ardian Hoxha u shpreh se, nuk ka më besim në çdo politikanë dhe ndihet i revoltuar që askush nuk merret me zbardhjen e të vërtetës. Ndërsa tha se këtë të vërtetë e di vetëm drejtuesi i SHIK.
“Unë si djali i tij kam humbur shpresën te çdo person që merret me politikën, pasi asnjë nga ata nuk merren me zbardhjen e së vërtetës, për të zbuluar eshtrat e tij në mënyrë që edhe ne të jemi të qetë shpirtërisht. E vërteta e zhdukjes së tij dihet, me në krye drejtuesin e SHIK-ut.
Edhe në gjykatë është vërtetuar se cilët kanë qenë personat që e kanë marrë. Rasti jonë u shndërrua në një luftë politike. Por tani nuk na intereson më politika, duam vetëm eshtrat e tij.
Ai u shpreh edhe për shpalljen “non grata” të ish-kryeministrit Berisha, ku tha se për familjen e tij ai ka qenë “non grata” me vite. Ndërsa kërkoi që shqipatrët të hapin sytë dhe të kuptojnë se kush është në të vërtetë Berisha.
“Berisha për familjen tonë ka qenë non- grata me vite. Me propagandën dhe mungesën e një media të lirë, ai ishte idhull i çdo shqiptari, deri sa u kuptua lidhja e tij me Millosheviçin dhe furnizimin e Serbisë me naftë, kur e gjithë bota i kishte vendosur embargo. Uroj që ky vendim t’i hap sytë popullit në Shqipëri dhe të kuptojnë edhe ata se çfarë dëmi historik i ka shkaktuar vendit ky njeri”, tha ai.
Remzi Hoxha, ishte një aktivist për çështjen etnike shqiptare në Kosovë, por ishte laruar për në Shqipëri për t’i shpëtuar persekutimit nga regjimi jugosllav. Në moshën 39- vjeçare ai u zhduk në mënyrë misterioze në Tiranë, por edhe sot e kësaj dite nuk është zbuluar e vërtetat.
