Misteri i vdekjes së 4 vizitorëve Rusë në një hotel në Qerret të Kavajës, vazhdon. Ndërsa ambasada ruse ka reaguar përmes një postimi në rrjetin social Facebook, duke theksuar se katër trupat e pajetë janë nisur mëngjesin e sotëm për në Rusi ku edhe do të kryhet një ekspertizë mjeko-ligjore shtesë për të mësuar shkaqet e vdekjes.
“Shpresojmë në marrjen sa më të shpejtë të përfundimeve zyrtare nga pala shqiptare, si edhe në bashkëpunimin e mëtejshëm të ngushtë të organeve ligjzbatuese ruse dhe shqiptare për sqarimin e rrethanave të tragjedisë”, shkruan ambasada ruse.
Sot djali i vetëm i familjes ruse që u shua në Qerret, Aleksandër Burenkova ka mbërritur në Tiranë për të tërhequr trupat e dy prindërve të tij Sergei Burenkova, 60 vjeç e Nataliia Burenkova, 58 vjeçe, të motrës së tij Ekaterina Burenkova dhe të fejuarit të kësaj të fundit, Nikita Belousov.
Prokuroria e Kavajës ka nisur hetimet për autorë, pasi dyshohet se ditën e ngjarjes ata nuk kanë qenë “vetëm”.
Edhe pse nuk ka një përfundim nga hetimet e kryera deri më tani, ngjarja e rëndë do të hetohet për veprën penale të vrasjes.
