Ish-shefi i Kadastrës së Vlorës, i cili dha dorëheqjen nga detyra në muajin shtator dhe u arrestua pak ditë më parë nën akuzën e “Shpërdorimit të detyrës” ka pretenduar se paratë e kapura gjatë aksionit, konkretisht 65 mijë euro janë të vëllait.
Prokuroria e Vlorës ka dyshime të forta se Klodian Troci, ish-shefi i Kadastrës në qytetin bregdetar, i arrestuar pak ditë më parë për akuzën e shpërdorimit të detyrës, mund të ketë falsifikuar të tjera dosje të pronave në fshatrat Dhërmi dhe Himarë.
Për këtë shkak, institucioni i akuzës ka sekuestruar një sërë dosjesh voluminoze dhe po kryen hetime përderisa dyshimet janë se ai në bashkëpunim me zyrtarë dhe ish-zyrtarë të tjerë ka ndërhyrë në dokumente përmes falsifikimit. Sipas dosjes së Prokurorisë, që nga viti 2019 deri në vitin 2021 Klodian Troci, Bardhyl Gjika dhe specialisti në Drejtorinë e Administrimit të Tokave pranë Këshillit të Qarkut të Vlorës, Kreshnik Miho, kanë bashkëpunuar duke falsifikuar dokumente arkivore të pronësisë, si tapi tokash apo përdorimi për banorë të fshatrave Himarë e Dhërmi etj.
Troci ka punuar për një periudhë gati tremujore si drejtor në Drejtorinë e Pronave në Qarkun e Vlorës, ku më pas u zëvendësua nga Bardhyl Gjika, gjithashtu i arrestuar nga Policia. Ky i fundit dyshohet se inskenoi vjedhjen e dy dosjeve të pronave në zyrat e Këshillit të Qarkut në Vlorë, me qëllim që të fshihnin falsifikimin e dokumenteve për llogari të shtetasit Spiro Duni. Çështja e pronës në fjalë në fshatin Dhërmi ishte në proces gjyqësor pas dyshimeve për falsifikim dhe organet e drejtësisë kanë kërkuar t’u vihen në dispozicion dokumentet origjinale.
