Grabitja e dhunshme dhe e përgjakshme e biznesmenit Nazmi Çangu disa ditë më parë në Nikël, është drejt zbardhjes. Por cilat janë provat që do të çojnë drejt identifikimit dhe arrestimit të autorëve për këtë rast të rëndë.
Një nga provat që do të çojnë në identifikimin dhe arrestimin e grabitësve të dhunshëm është dëshmia e vajzës dhe vetë biznesmenit. Më herët Xhelona Çangu u shpreh se nisur nga e folura, dyshon se autorët kanë qenë nga zona e Laçit dhe se flisnin me kufje mes tyre.
Për këtë arsye policia dhe prokuroria i ka kërkuar kompanive celulare që të zbardhë thirrjet telefonike përreth banesës së familjes Çangu ditën që ndodhi ngjarja, çka mund të ndihmojë deri në zbulimin e grabitësve.
Po ashtu prova kyçe që mund të çojnë deri në identifikimin e autorëve, janë një armë gjahu çifte, fasheta plastike me ngjyrë të zeza pa pjesën mbyllëse; një fishek brave i këputur përgjysmë dhe kapaku i jashtëm, si dhe një kapele me ngjyrë të zeza me strehë. Që kanë lënë pas grabitësit. Ato janë çuar në laborator për ekzaminim nëse ka ose jo shenja gishtash.
Sakaq, vetë policia e Shtetit ka deklaruar se është fare pranë kapjes së autorëve që torturuan dhe grabitën biznesmenin Nazmi Çangu në Nikël të Krujës. Albert Dervishaj, zv.drejtor i Policisë së Shtetit, deklaroi sot se autoritetet kanë siguruar prova dhe kanë punuar intensivisht për zbardhjen e grabitjes dhe dhunimit të biznesmenit Nazmi Çangu në Fushë Krujë. Sipas Dervishajt, shumë shpejt do të ketë lajme pozitive për këtë ngjarje.
