Futbollisti i talentuar shqiptar Ernest Muçi ka theksuar së fundmi se tifozët e Partizanit ende nuk e kanë harruar atë pasi ishte kthyer në “macen” e zezë të të kuqve. Ndër të tjera futbollisti i Legias zbuloi se nuk ka patur kontakte nga trajneri Edi Reja.
“Javën e derbit tifozët mundohen të fryjnë sa më shumë derbin që të ketë audiencë, të bëjnë kundërshtarët pak me nerva. Por gjithmonë ajo fitore 5-1 e ata dy gola nuk do të harrohen lehtë si nga kampi i Partizanit, ashtu edhe nga tifozët tanë. Nuk besoj se do të harrohen lehtë. Të Partizanit do i kujtojnë më shumë.
Jam shumë i kënaqur, mendoj se ishte klubi më i mirë që mund të zgjidhja, deri tani po bëj shumë mirë dhe ekipi është një emër i madh, po luan në Europa Ligë, kampionati është i fortë. Besoj se do të bëj mirë. Nuk po kalojmë një moment shumë të mirë në kampionat por besoj se do ta kthejmë në fazën e dytë të sezonit.
Kontakte me Rejan? Jo, akoma nuk është se me ka thënë ndonjë gjë, akoma nuk kam pasur ndonjë kontakt me te. Por kam ndjekur kombëtaren dhe e di çfarë kërkon nga sulmuesit”, theksoi Ernest Muçi.
