Një operacion anti-drogë është zhvilluar në Durrës, ku është arrestuar në flagrancë kryeplaku i fshatit Nojë, ndërsa është shpallur në kërkim një tjetër.
Sipas njoftimit zyrtar, strukturat e DVP Durrës dhe shërbimet e Komisariatit të Policisë Krujë, finalizuan operacionin policor të koduar “Noja”, në kuadër të të cilit u arrestua H. M., 66 vjeç, banues në fshatin Nojë, Krujë, me detyrë kryeplak i fshatit Nojë, për veprat penale “Shpërdorim detyre” dhe “Prodhimi dhe shitja e narkotikëve”.
Gjithashtu, u bë shpallja në kërkim e shtetasit Bujat Sefa (Xhafa), 34 vjeç, banues në Nojë, Krujë, për veprat penale “Prodhimi dhe shitja e narkotikëve” dhe “Armëmbajtje pa leje”.
Shërbimet e Policisë, gjatë kontrollit të ushtruar në banesat e tyre, gjetën dhe sekuestruan në cilësinë e provës materiale një sasi prej 145 kg lëndë narkotike cannabis sativa, gati për shitje, si dhe municion luftarak.
Materialet i kaluan Prokurorisë së Rrethit Gjyqësor Krujë, për veprime të mëtejshme.
