Partia Demokratike nuk ka votuar kundër borxhit 700 milionë Euro që do të marrë qeveria nëpërmjet lëshimit të eurobondit dhe as për kredinë që do të marrë OSHEE nga BERZH. Por ama ka rezervat dhe kritikat e saj lidhur me disa pika të paqarta, por shumë të rëndësishëme sa i përket planit për shpërndarjen e eurobondit. Këtë çështje e ka sqaruar sot sekretari i grupit parlamentar të PD, Arbër Agalliu, i cili gjatë një interviste televizive konfirmoi marrjen e urdhrit me një mesazh në telefon, por dha edhe arsyetimin për publikun.
Sipas tij, ishte normale që të vinin mesazhe të tilla duke shtuar se vendimi është marrë edhe në koordinim me partneret ekonomikë ndërkombëtarë. Agalliu tha se PD po kërkon vetëm të eliminojë abuzimet që mund të bëjë qeveria në përdorimin e këtij fondi.
“Personalisht as nuk kam marrë dhe nuk kam dërguar mesazh në raport me borxhin e OSHEE-së. Por grupi parlamentar funksionon si i tillë dhe në funksion të tyre komisionet përkatëse japin këshillat në funksion të tematikave. Ata na rekomandojnë sepse janë ekspertë. Komisioni i Ekonomisë po ta hapni do të shikoni diskutimet që kolegët kanë lidhur me këtë borxh. Janë argumentuar të gjitha shqetësimet tona në lidhje me borxhin. Nuk është problemi tek marrja e borxhit por tek shpërndarja dhe menaxhimi. Kemi marrë një vendim në funksion të situatës dhe marrëdhënieve që kemi me partnerët tanë ndërkombëtarë sikurse BERZH. Por kjo nuk do të thotë që kjo qeveri shpërndan paratë siç duhet. Kur të dëshironi jam gati të vij dhe të argumentoj çdo qëndrim tonin”, tha ai.
Kujtojmë se në seancën plenare të 28 tetorit, nga opozita u votua pro borxhit 700 milionë euro dhe abstenim për kredinë e OSHEE-së. Kur pretendojnë se ka pasur abuzime, mos ndoshta duhet që të bëjnë detyrën e tyre si opozitë dhe të ngrenë lart kartonat e kuq. Këto kanë qenë dhe disa nga arsyet që miratimi i këtij borxhi u shoqërua me një sërë përplasjesh mes mazhorancës dhe opozitës.
