Nënkryetari i Partisë Demokratike, Alfred Rushaj ka zhvilluar një takim me banorët e shtëpive që po shemben tek lagja “5 Maji”.
Gjatë takimit, Rushaj tha se qeveria ka shkelur ligjin dhe kushtetutën, duke u prishur shtëpitë pa shpërblim paraprak dhe duke u tallur me banorët e zonës.
“Kontrata është një turp. Aty thuhet po ta prish shtëpinë dhe të premtoj se pak më vonë do të të them, nëse do të marrësh apo jo shtëpi, kur, ku, dhe si do ta marrësh. Duhet lexuar kontrata për të parë sesi qeveria tallet me njerëzit”, tha Rushaj.
Banorët vunë në dukje se aty jo vetëm nuk ka shkuar asnjë deputet i PS, por asnjë nga institucionet, përfshirë bashkinë dhe kryeministrinë, nuk iu janë përgjigjur kërkesave për të dhënë shpjegime. ”Këta i kanë bllokuar legalizimet, se kanë interesat e veta me vjedhë pronat tona”. “Erion Veliaj dhe Edi Rama të vijnë të japin llogari. Çfarë duhet të na bëjnë tjetër, veçse të na vrasin”, tha një nga banorët.
Banorët hodhën poshtë deklaratat e bashkisë se shumica e tyre kanë firmosur për prishjen e shtëpive, duke e konsideruar qëndrimin si përçarës dhe kundër interesit të tyre. “Mendojini mirë kur të prishni shtëpitë tona, se do ta lini një ditë atë karrige”, tha një nga banorët, të cilit në janar para zgjedhjeve, kryeministri Rama i kishte premtuar t’i shtrojë rrugën, ndërsa tani po u prish shtëpinë pa asnjë shpërblim. “Të gjithë banorët janë pajisur me mandatpagesë deri më qershor 2013, që do të thotë se u ka lindur e drejta e legalizimit, e cila nuk humbet, edhe nëse pagesa nuk kryhet. Nuk na japin certifikatat e pronësisë, që të mos na paguajnë sipas ligjit”, u shprehën të irrituar.
Nisur nga tërmeti i 26 nëntorit, qeveria ka vendosur që kjo zonë të shndërrohet në një hapësirë eksperimantale dhe inovatore, ku do të strehohen jo vetëm familjet që humbën shtëpitë nga tërmeti.
Ekspertë të fushës së urbanistikës kanë ngritur shqetësimin se qeveria po shfrytëzon aktet normative të miratuara në emergjencë për rindërtimin, për të zbatuar projekte të paracaktuara në planin urbanistik “Tirana 2030”. Tirana, Kombinati dhe Paskuqani nuk kanë qenë pjesë e rindërtimit, por situata e tërmetit po shfrytëzohet në mënyrë të artë nga kryeministri Rama dhe kryebashkiaku Veliaj për interesat personale.
