Reperi i njohur shqiptar, MC Kresha, gjatë një interviste për “Libero”, ka treguar rreth fëmijërisë së tij dhe se si iu ndërpre ëndrra për futboll, për t’u fokusuar më vonë në muzikë.
Ai shprehet se ka pasur gjithmonë dëshirë me qenë portier, por për shkak të një lëndimi në gju, ai nuk ka mundur dot të vazhdojë futbollin.
“Gjithë kohës kam imagjinuar veten nëpër stadiume të mëdhaja duke luajtur futboll, me tregu talentin tim. Edhe pse prej fëmijë kam pasur dëshirë me qenë portier. Kam ushtruar në klube të ndryshme si fëmijë dhe kam qenë mjaft i suksesshëm. Me kalimin e kohës në moshën 17-18 vjeçare, kur unë duhej të kaloja në lojtar profesionist, kam pësuar një lëndim në gju, që më kushtoi me karrierë dhe ajo ka bërë që unë mos të luaj futboll, si profesionist”, ka thënë MC Kresha.
Ai tha se pavarësisht që nuk mund të shijonte atmosferën e mbushur me tifoz në stadiumet e futbollit, është i lumtur që ka shijuar pothuajse të njëjtën gjë në koncerte.
“Kam patur një rënie emocionale sepse aty u ndërpre ëndrra ime dhe më vonë kam filluar të merrem me diçka që e kam patur vetëm hobi, që është muzika. Babai ishte kundër kësaj, ai kishte një arsye të fortë sepse siç do prind ka dëshirë që fëmija i tij të edukohet, sepse arti është një mënyrë tjetër e emancipimit. Por prindërit e mi kurrë nuk ma kanë ndërpre ëndërr e dytë, që ishte të arrija përmes muzikës”, u shpreh reperi.
Kujtojmë që MC Kresha mbetet aktiv në muzikë, kënga e tij e fundit është bashkëpunimi me këngëtaren, Dafina Zeqiri “Vet e lype”.
