Visar Bekaj portier i skuadrës së Tiranës ka theksuar në vigjilje të ndeshjes ndaj Dinamos se derbi i kryeqytetit është ndaj Partizanit duke thumbuar dinamovitët. Më pas portieri kosovar ndalet tek analiza e kësaj vigjiljes dhe formën e Tiranës.
“Jemi të fokusuar si çdo ndeshje tjetër, do të japim maksimumin. Atmosfera është shumë e mirë në ekip dhe besoj se do të marrim dhe një rezultat pozitiv. Do të japim maksimumin në ndeshjen në Kupës sepse edhe ata të njëjtën gjë do të bëjnë, po u lodhëm ne do të lodhen dhe ata. Duhet të japim gjithçka në dy ndeshjet, pastaj kemi pauzën e kombëtareve.
7 skuadra mendoj se janë favorite për fitimin e titullit kampion. E veçoj ndeshjet me Partizanin, jo se kam frikë, por është ndeshje më me emocion dhe më e vështirë. Dua fitoren në kampionat dhe kualifikimin në Kupë.
Objektivi personal është që të fitojmë titullin kampion dhe të arrijmë diku në arenën ndërkombëtare, por është herët për të diskutuar nëse do të shpallemi kampion ose jo. Sigurisht, synimi ynë është titulli kampion, por të ecim ndeshje pas ndeshje siç e kemi nisur dhe besoj se do t’ia dalim.
Derbi ndaj Partizanit është më i madh dhe ajo fitore kundër tyre na ka dhënë një shtysë shumë të madhe pastaj dhe fitorja me Vllazninë që nëse nuk do ta kishim fituar nuk do të kishte vlejtur as ajo ndaj Partizanit. Vllaznia ka më shumë cilësi se Partizani, i kemi mundur dhe ata dhe besoj se jemi shumë të motivuar edhe për dy ndeshjet me Dinamon. E kam përjetuar më shumë derbin ndaj Partizanin edhe pse nuk kemi luajtur ndeshje zyrtare pavarësisht një miqësoreje, por e shoh që me Partizanin ka më shumë rivalitet”, tha Bekaj.
Discussion about this post