Lektori i të Drejtës Kushtetuese, Erind Mërkuri, ka komentuar sot rreth vendimit të Kushtetueses për zgjedhjet e 30 qershorit 2019. Përmes një interviste televizive ai tha se, ky vendim përcolli një mesazh të rëndësishëm për politikën.
Mërkuri tha se Kushtetuesja ka ndjekur logjikën e opinionit të Venecias dhe se ky vendim ishte i pritshëm.
“Mendoj që ka operuar me logjikën e opinionit të Venecias. Kjo lidhet me kërkesën e Shoqatës së Bashkuar, e cila nuk qe rruga e duhur. Ndikim ka pasur edhe Venecia dhe gjykata e ka marrë në konsideratë. Politika duhet ta lexojë që nuk është e drejta që i përshtatet politikës, por është politika që duhet t’i përshtatet të drejtës”, tha ai.
Sipas tij, vendimi i Kushtetueses i hap rrugë dekretimit të një date nga presidenti për zgjedhje të parakohshme në gjashtë bashki. Mërkuri u shpreh se kreu i shtetit duhej të kishte shpallur më parë datën e zgjedhjeve në këto bashki. “Presidenti nuk kishte pse të priste vendimin e Kushtetueses. Tani presidenti duhet të veprojë në mënyrë që qeverisja vendore të jetë sa më parë pranë qytetarëve të saj”, tha ai.
Kushtetuesja sot dha përgjigjen përfundimtare rreth 30 qershorit, duke rrëzuar padinë e Shoqatës së Bashkive.
Discussion about this post