Një qytetare nga Divjaka ka denoncuar shefin e Komisariatit të këtij qyteti për dhunë.
Mësohet se qytetarja Elsa Bita ka thënë se është dhunuar nga shefi i Komisariatit të Divjakës, Altin Shehu, pasi ka filmuar një takim elektoral.
Ajo ka mbërritur në Urgjencën e Spitalit të Lushnjes për të marrë ndihmë mjekësore, ndërsa pasi është qetësuar, ajo ka thënë se ka qenë duke filmuar live nga “Facebook” takimin, kur i kanë dalë para katër persona, mes të cilëve dhe kreu i policisë në Divjakë, ku ky i fundit, siç pretendon qytetarja, i ka thyer kyçin e dorës së majtë dhe telefonin.
Në spital për të vizituar qytetaren e dhunuar ka shkuar edhe kandidati i PD në këtë zonë, i cili ka kërkuar arrestimin e shefit të policisë.
Ministria e Brendshme ka reaguar në lidhje me denoncimin për dhunë nga aktivistja e Partisë Demokratike në Divjakë. Ministria njofton se nën drejtim e Prokurorisë, SHÇBA po kryen veprime hetimore mbi gjithë rrethanat.
Po ashtu, njoftohet se, me urdhër të Drejtorit të Përgjithshëm të Policisë së Shtetit, ka nisur një hetim administrativ nga Drejtoria e Standardeve Profesionale. Në fund të gjithë veprimeve hetimore administrative dhe verifikimeve të tjera nën drejtimin e Prokurorisë, do të bëhen publike rezultatet dhe masat e marra mbi rastin.
