A duhet të gëzohet Edi Rama?

Nga Ola Xama

Kryeministri u duk i dehur dje nga ngjyra që mori harta e Shqipërisë pas publikimit të rezultatit për kryetarët e bashkive. Tha se votën e lexon si një mbështetje por dhe përgjegjësi, ndërsa u shpreh i surprizuar nga besimi që po gëzon pas 10 vitesh në pushtet.

Politika si shkencë shoqërore mund të ketë shumë interpretime se si shihet apo argumentohet rezultati i zgjedhjeve. Unë këtë herë kam zgjedhur që mesazhin e zgjedhjeve ta lexoj nga shifrat.

Numri i zgjedhësve në lista është 3.650.550. Më 14 maj, (pa 2 QV në Shijak të papërditësuara) janë 1.399.826 persona që kanë votuar. Ky numër përbën më pak se gjysmën, 38.34% të zgjedhësve. Nëse e shohim në raport me statistikat e INSTAT për ata që jetojnë në Shqipëri, zgjedhës mbi 18 vjeç në vitin 2022 janë 2.244.307. Pra, faktikisht rezulton që të kenë votuar 62% e banorëve të vendit.

Edhe pse përqindja nuk është e ulët në raport me vendet perëndimore, krahasuar me zgjedhjet e mëparshme të mbajtura në Shqipëri, numri i votuesve ka rënë masivisht. Janë 257 mije votues më pak se në vitin 2021, dhe po aq më pak se në 2017 dhe 2015.

Nëse do të lexonim rezultatin ndryshe, do të shohim se Partia Socialiste ka marrë 17.835 vota më pak se në vitin 2021 dhe 206.745 se në 2015-n. Pra, mbështetja ka rënë. Atëherë çfarë ka ndodhur që PS ka fituar? Një pjesë e mirë e atyre që në këto vite kanë votuar socialistët, nuk kanë dalë fare të votojnë. Janë 844.481 që jetojnë në Shqipëri dhe nuk kanë votuar.

Për herë të parë në 10 vjet numri i atyre që nuk kanë votuar për kandidatët e Ramës, është më i lartë se i qytetarëve që i kanë votuar. Shifrat tregojnë se në këto zgjedhje nuk kemi fitues, por vetëm humbës. Dhe humbësi kryesor është koalicioni “Bashkë Fitojmë”.

Më së shumti ata që kanë dalë të votojnë këtë herë janë militantët dhe administrata. Sikur 183 mijë që punojnë në sektorin publik (qeveri qendrore, bashki dhe ndërmarrje shtetërore) ta shumëzonim me 3.7 (mesatarja sipas INSTAT e anëtarëve të një familje), ja ku na dolën 670 mijë vota.

Ndaj Edi Rama këtë herë nuk duhet të gëzohet, sepse sot ata që e duan janë më pak në numër, pavarësisht se harta është ngjyrosur më shumë. Sot ata që e mbështetin janë vetëm një e treta. Ai mund të qeverisë sërish 4 vjet të tjera shumicën e territorit të bashkive dhe këtë herë bashkë me Shkodrën, por jo se ka fituar ai, por sepse ka humbur opozita. Vota “abstenim” e atyre që nuk dolën të votojnë askënd, tregoi se shqiptarët nuk janë budallenj siç i kujtojnë partitë e mëdha.

Nuk frymëzon dot dhe nuk bëhesh alternativë po s’u ndave nga ajo që shohin të gjithë: kapjen e ekonomisë dhe shtetit nga bandat e oligarkët. Nuk del njeri të votojë për ndryshimin e dorës që i vendos ata mbi kurrizin e shqiptarëve!