Momenti kur Will Smith u ngrit dhe gjuajti me shuplakë komedianin Chris Rock – pasi ky i fundit bëri shaka me flokët e rruar të bashkëshortes së Smith, Jada – do të mbahet mend gjatë në historinë e Oscars.
Interneti duket se është ndarë në dy pjsë: Disa dënojnë dhunën e aktorit duke e konsideruar atë “momentin më të shëmtuar” në historinë e Oscars, ndërsa të tjerë kritikojnë Chris Rock për faktin që u tall me sëmundjen e Jada-s, e cila ka treguar se ka alopecia që shkakton rënien e flokëve. Megjithatë, në mesin e këtyre #TeamWill dhe #TeamChris, njerëzit po harrojnë personin që është në qendër të dramës: Jada. Reagimi i burrit të saj ishte i dobishëm dhe mbrojtës apo thjesht i përkeqësoi gjërat?
Kur jeni në një lidhje, çfarë duhet të bëni nëse partneri/ja ofendohet, tallet apo abuzohet? “Mendoj se është e arsyeshme të presësh që partneri/ja të të mbështesë gjatë momenteve të vështira,” tha për Mirror Naomi Segal, psikoterapiste çiftesh dhe themeluese e The Couple Consultancy. Naomi theksoi se mbështetja do të jetë e ndryshme për çdo çift dhe do të varet nga rrethanat e situatës.
“Të shihni se partneri/ja sulmohet verbalisht ose fizikisht ka të ngjarë të krijojë një reagim mjaft të fortë emocional edhe tek ju, kështu që në këtë kuptim, është diçka që po ju ndodh të dyve në mënyra të ndryshme, jo vetëm personit që është subjekt i sulm,” shpjegoi ajo.
Nëse problemet nuk janë rrezik i menjëhershëm fizik, Naomi thotë se mund të jetë e dobishme që fillimisht të kontrolloni se si ndiheni të dy për situatën dhe të shihni se për çfarë mbështetje ka nevojë ai/ajo. “Zemërimi dhe dhuna janë gjëra të ndryshme. Zemërimi është reagim emocional, dhuna është reagim fizik. Të ndihesh i zemëruar për një padrejtësi mund të jetë një përgjigje normale emocionale në disa situata. Dhuna mund të jetë një shfaqje e zemërimit, kjo varet nga individi.”
Liam Barnett, trajner marrëdhëniesh, thekson se duhet që t’i lejoni partnerin/es që të ketë mundësinë të përballet vetë, në mënyrën e tij/saj. “Reagimi i menjëhershëm mund t’i bëjë ata të ndihen inferiorë dhe të dobët ndaj personit që po i fyen,” tha Liam për Mirror. “Nëse vini re se kanë nevojë për ndihmë, atëherë mund të ndërhyni duke vendosur disa kufij.”
Në situatën e Jada dhe Will, mendohet se qëllimi i Will ishte të ngrihej në mbrojtje të gruas dhe të dënonte mungesën e respektit të shkaktuar nga komenti i Chris. Megjithatë disa njerëz pyesin nëse nuk do të kishte qenë më mirë ta zgjidhte çështjen privatisht apo pas ceremonisë.
“Kjo varet”, thotë Naomi. “Bërja e një deklarate publike mund të jetë një mënyrë e dobishme për të edukuar njerëzit për diçka që është keqkuptuar ose keqinterpretuar. Megjithatë, që të jetë efektive, kërkon mënyrën e duhur për të argumentuar se pse gjithë çfarë që ndodhi ishte lënduese, gjë që dhuna në të vërtetë nuk e lejon.”
Discussion about this post