Afera “5D”/ SPAK sërish në zyrat e Bashkisë së Tiranës dhe UKT, sekuestrohen dokumente

Prokuroria e Posaçme ka thelluar hetimet për dosjen “5D”, në kuadër të të cilës u arrestuan 3 drejtorët e bashkisë së Tiranës, Mariglen Qato, Redi Molla dhe Taulant Tusha.

Byroja Kombëtare e Hetimit, me kërkesë të SPAK, ka ushtruar së fundmi kontrolle në zyrat e Bashkisë së Tiranës dhe Ujësjellës Kanalizimeve, ku janë sekuestruar disa dokumente.

SPAK ka kërkuar nga Bashkia dhe drejtoritë përkatëse të dhënat mbi zbatimin e projekteve, shumat përkatëse, kush kanë qenë kostot në raport me zbatimin. Të dhëna janë kërkuar edhe nga VAS Konstruksion, paraardhëse e “5D Konstruksion”.

Janë duke u grumbulluar nga organi i akuzës dosjet e prokurorimeve publike, ku në disa prej tyre, autoritet kontraktor është Bashkia se Tiranës, e drejtuar nga Erion Veliaj.

Ndërkohë, burime thanë se ka nisur edhe një hetim pasuror për drejtorët e arrestuar të Veliajt.

SPAK e akuzon Redi Mollën e Mariglen Qato së bashku me zyrtarë të tjerë të bashkisë se favorizuan kompaninë “5D Konstruksion” në tendera punësh publike. Kompania është regjistruar në pronësinë e Nestor Muhametllarit, por prokuroria pretendon se ka “de fackto” zotërues Mollën dhe Qaton. Kompania 5D Konstruksion u themelua në vitin 2016 me emrin “Igor Elektrik” dhe e ndryshoi më pas emrin në vitin 2019 në V.A.S. Konstruksion dhe më pas në vitin 2021 në 5D Konstruksion. Të dhënat e bilanceve të kompanisë të depozituara në Qendrën Kombëtare të Biznesit, tregojnë se të ardhurat e saj ishin në masën 2.2 miliardë lekë [rreth 20 milionë euro] për periudhën nga viti 2016 kur u themelua deri në vitin 2022. Nga të dhënat e prokurimeve publike, kompania ka fituar 29 kontrata me vlerë të përgjithshme prej 1.8 miliardë lekësh.

Sipas SPAK, Qato dhe Molla e kishin fshehur pronësinë mbi kompaninë 5D Konstruksion përmes ortakëve fiktivë në aktet e regjistrimit.

Në dosjen hetimore ka indice – siç është dëshmia e një prej punonjësve të firmës në fjalë – se pas kompanisë 5D” fshihet vetë Erion Veliaj. Opozita, që proteston prej javësh duke kërkuar dorëheqjen dhe arrestimin e Veliajt, e cilëson këtë të fundit “kokën e bandës së drejtorëve hajdutë”.

Vetë Veliaj ka mohuar akuzat duke pretenduar se nuk ka dijeni për aferat e vartësve.