Agjencia Ndërkombëtare për Energjinë Atomike: Nuk kemi thënë se Irani po ndërton bombën bërthamore

«Kemi arritur në përfundimin se nuk mund të themi se Irani po bën një përpjekje sistematike për të prodhuar një armë bërthamore».

Kështu u shpreh drejtori i AIEA-s, Rafael Grossi, në një intervistë për Sky News. Raporti i AIEA-s, i cili është cituar gjerësisht nga Izraeli, tregon se Irani po pasuron deri në 60% uran, duke qenë i vetmi shtet në botë që e bën këtë.

Pra, «ka elemente shqetësimi», shpjegoi Grossi, duke shtuar se: «Por të themi që ata janë duke ndërtuar dhe prodhuar një armë bërthamore, jo, ne nuk e kemi thënë këtë».

Edhe Sekretari i Përgjithshëm i Kombeve të Bashkuara, Antonio Guterres, ka bërë thirrje kundër “ndërkombëtarizimit të mëtejshëm” të konfliktit Iran-Izrael.

Ai ka paralajmëruar se ndërhyrjet e reja ushtarake mund të kenë pasoja të rënda jo vetëm për rajonin, por dhe më gjerë.

“Çdo ndërhyrje ushtarake shtesë mund të ketë pasoja të mëdha, jo vetëm për palët e përfshira, por për të gjithë rajonin dhe për paqen e sigurinë ndërkombëtare në përgjithësi,” tha Guterres në një deklaratë zyrtare të shpërndarë sot.

Komentet e tij vijnë në një kohë kur Presidenti i SHBA-së, Donald Trump, thuhet se po përgatitet të përdorë asetet ushtarake amerikane për të goditur objektet bërthamore iraniane.

“Mund ta bëj, mund të mos e bëj,” deklaroi Trump sot, kur u pyet për mundësinë e një sulmi amerikan ndaj Iranit.

Ndërkohë ka pasur sulme të reja midis Iranit dhe Izraelit, me Teheranin që njofton se ka përdorur edhe sulme hipersonike dhe IDF që siguron se ka goditur vendet e programit bërthamor të Teheranit. Ministri i Mbrojtjes së Izraelit, Israel Katz deklaroi se avionët luftarakë izraelitë “kanë shkatërruar selinë qendrore të sigurisë së brendshme të regjimit iranian, organin kryesor shtypës të diktatorit iranian”.

Udhëheqësi suprem i Iranit, Ajatollah Ali Khamenei, shkroi në një postim në X se “beteja ka filluar” dhe vendi i tij nuk do të tregojë “asnjë mëshirë” ndaj udhëheqësve izraelitë: “Ne do t’i japim një përgjigje të fortë regjimit terrorist sionist”.

Mesazhi erdhi disa orë pasi Trump i kërkoi Teheranit një “dorëzim pa kushte”. Ambasadori iranian në OKB në Gjenevë tha se Teherani do t’u përgjigjet “pa kufij” sulmeve të Izraelit dhe, në rast të përfshirjes së drejtpërdrejtë, edhe atyre të Shteteve të Bashkuara.

gijotina.com/