Një vajzë 21-vjeçare shtatzënë ka vdekur në një aksident të tmerrshëm kur flokët e saj u kapën nga një makineri që prodhonte tel saldimi, gjatë një vizite në një fabrikë në Bjellorusi.
Umida Nazarova, e cila ishte shtatë javë shtatzënë, po aplikonte për punë në fabrikën ‘Svarmet’ në Borisov e cila prodhon elektroda dhe tel saldimi, bëjnë me dije mediat e huaja.
Teksa dikush po i tregonte ambjentet e fabrikës, flokët e saj mbetën të bllokuara tragjikisht në një prej makinerive industriale.
“Flokët e saj iu mbështollën rreth qafës”, tha nëna e saj Olga, për mediat.
Megjithse ishte çliruar nga kapja, vajza raportohet se nuk u zgjua më kurrë dhe vdiq nga plagët.
“Humbën dy jetë, ajo ishte shtatë javë shtatzënë. Ata e panë që i kishte flokët e gjata, përse nuk i dhanë diçka që t’i mbulonte?” tha babai i saj Dmitry.
Hetuesit bjellorusë thanë gjithashtu se në momentin e tragjedisë, punonjësja që po shoqëronte Nazarova ishte kthyer për të bërë një regjistrim te parametrat e fabrikës.
“Kur ajo ktheu kokën, vajza ishte përtokë pa ndjenja. Flokët e saj ishin kapur në makineri”, thanë hetuesit.
Një zyrtar i fabrikës është akuzuar për mangësi në detyrën zyrtare prej neglizhencës duke shkaktuar vdekjen e një personi.
Fabrika kishte paguar për funeralin e të resë.
Së fundmi, nëna e viktimës tha se familja dëshironte të celebronte martesën e saj dhe të priste nipin ose mbesën që do të lindte.
“Nuk është kjo që desha për fëmijën tim”.
Discussion about this post