Një aksident i rëndë ka ndodhur në autostradën Durrës-Tiranë, ku një autobus i linjës Berat-Tiranë është përmbysur në rrugë, ndërsa shoferi humbi jetën.
Udhëtimi nga berati drejt Tiranës u ndërpre për pasagjerët e këtij mikro-buzi, i cili u përfshi në një aksident të rëndë.
Teksa ishte në hyrje të Tiranës në zonën e Mëzezit, mjeti devijoi në të djathtë të rrugës, duke u përplasur fillimisht me bordurën e pastaj me trafikndarsen që la pas 1 të vdekur dhe 12 të plagosur.
Shoferi 36-vjeçari Redion Hasimi humbi jetën në vendngjarje, ndërsa 12 të tjerë u çuan të plagosur në spital. 7 prej të plagosurve kanë marrë dëmtime më serioze ku në luftë me jetën është edhe një fëmijë.
Nisur nga hetimet paraprake mjeti ka qenë brenda kufirit të lejuar të shpejtësisë dhe dyshohet se aksidenti të ketë ndodhur për ndonjë përgjumje apo kolaps shëndetësor i drejtuesit të mjetit.
Në vendngjarje një prej pasagjerëve që i mbijetoi këtij aksidenti të rëndë, ishte edhe nje e huaj qe kishte ardhur në Shqipëri për turizëm.
“Jam Debora nga Amerika. Isha në Shqipëri për qejf, u kënaqa shumë. Nesër do të kthehem në Amerikë dhe sot po vija në Tiranë. Rrugës pashë shoferin që bënte lëvizje, rrotullohej, nuk ishte mirë. Po shkruaja në telefon kur autobusi u përmbys. Ata që ishin ulur në anën e majtë të mjetit morën dëmtime shumë të rënda. Shoferin e pashë që vdiq. Dëmtime të rënda mori edhe djali i ulur pas tij dhe një vajzë. Unë isha ulur në anën e djathtë. Nuk u lëndova. Shumë njerëz nga ndërtesat afër dhe shoferë ndaluan të na ndihmonin”, u shpreh ajo.
Ekspertet rrugorë po kryejnë të gjitha matjet në vendngjarje për të dokumentuar këtë aksident të rëndë si dhe për të nxjerrë shkaqet e këtij devijimi të rëndë që la pas të vdekur shoferin dhe dhjetëra të plagosur.
Discussion about this post