Policia e Lezhës ka zbardhur aksidentin e rëndë ku u përfshi makina e Sali Berishës në aksin rrugor Milot-Thumanë, duke hedhur poshtë pretendimet e ish-kryeministrit se një makinë hyri me qëllim për t’i prerë rrugën.
Burimet nga policia e Lezhës bënë me dije se për aksidentin e ndodhur një natë më parë, është vënë në hetim një 24-vjeçar, i identifikuar me emrin Albin Menitoviç, banues në Prishtinë të Kosovës.
Të njëjta burime bëjnë me dije se personi në fjalë mbrëmjen e djeshme në aksin rrugor Milot-Thumanë, pranë Fushë-Mamurrasit, duke drejtuar automjetin tip “Benz ”, ka goditur mjetin tjetër tip “Benz ” me drejtues Salo Lazri, 28 vjeç, banues në Tiranë. Më pas, mjeti i Lazrit ka goditur mjetin shoqërues të deputetit Sali Berisha. “Të 3 automjetet qarkullonin në një sens lëvizjeje, në korsinë e shpejtësisë.
Si pasojë e goditjes kanë marrë dëmtime të lehta shoferët Albin Menitoviç dhe Salo Lazri dhe pasagjeri Edi Sinani, banues në Kosovë, të cilët pasi kanë marrë mjekim në spital, janë larguar për në banesë”, deklaroi policia e Lezhës.
Por ky variant i policisë ka rrëzuar pretendimet e truprojës së Berishës, Ervis Tusha, i cili deklaroi se pas takimit në qytetin e Laçit rrugës në kthim në autostradën Milot-Mamurras, në drejtimin e tyre vjen një Mercedes i bardhe me targa të Kosovës, me shpejtësi dhe kundërvajtje.
Pra, ai pretendoi se makina e shqiptarit nga Kosova, Albin Menitoviç ishte kundërvajtje, por ky variant është hedhur poshtë nga policia, e cila ka përforcuar se të tre automjetet kanë qenë në të njëjtin drejtim. Për këtë, policia ka dyshime se të gjitha mjetet kanë qenë me shpejtësi tej normave të lejuara dhe për këtë arsye materialet janë referuar në prokurori për të gjithë për shkelje të rregullave të qarkullimit rrugor.
Discussion about this post