Pas Florian Muçës dhe Loran Dushës, SPAK ka vënë në pranga dhe Ariola Kodrën, Administratore e Inceneratorit Integrated Energy BV SPV. Kjo e fundit, ka dëshmuar vetëm një herë në Komision dhe pse është thirrur vazhdimisht nga kryetarja Jorida Tabaku.
Kodra është pyetur në lidhje me njohjet me Klodian Zoton, Stela Gugalljan dhe Mirel Mërtirin për të cilët tha se nuk ka pasur takime nga afër pasi ka një staf që merret me këto gjëra. E pyetur nga Tabaku nëse ka pasur njohje me kryeministrin Edi Rama apo ministrin Damian Gjiknuri, Kodra tha se i njeh vetëm si politikanë dhe figura publike e se nuk ka pasur asnjë kontakt nga afër me ta.
Përsa i përket periudhës së punësimit dhe pagës që ka marrë nga Inceneratori i Tiranës babai i deputetit Alqi Bllako, Edmond Bllako, Tabaku nuk ka arritur që të marrë dot përgjigje. Kodra fillimisht tha se Bllako është punësuar e larguar para se ajo të bëhej administratore. Por kur Tabaku nxori të dhënat me pagat, administratorja ndërroi version dhe tha se babai i deputetit është punësuar para se të vinte ajo, por është larguar gjatë kohës që vetë Kodra ka qenë administratore e kompanisë.
Më herët, policia arrestoi Florian Muça, drejtori i AlbPetrol, dikur anëtar i Komisionit të Prokurimit për inceneratorin e Fierit dhe administratori aktual për inceneratorin e Fierit, Loran Dusha që u mor në pyetje nga Komisioni.
Në total, mësohet se janë 13 urdhër arreste, ndërsa pas ekzekutimit të tyre, pritet që të dalë me njoftim zyrtar për arrestimet. Kujtojmë se në kërkim për këtë çështje janë shpallur Mirel Mërtiri, Stela Gugallja si dhe Klodjan Zoto, ndërsa është arrestuar ish-ministri Lefter Koka.
Discussion about this post