Aktori i teatrit dhe kinematografisë shqiptare Kastriot Çaushi sot feston 67-vjetorin e lindjes. Lindi në Tepelenë më 14 qershor 1954. Në periudhën kohore 1973 – 1976 kreu studimet e larta në “Akademinë e Arteve të Bukura” për aktim dhe pasi mbaron studimet fillon punën po si aktor në trupën profesioniste të teatrit “Skampa” të Elbasanit, vetëm një vit më vonë nga 1977 deri në vitin 1982.
Më 1982 emërohet pedagog në “Akademinë e Arteve të Bukura” në Tiranë, në degën e Dramës. Në vitet 1997-2007 ka qenë edhe rektori i Akademisë së Arteve për dy mandate ndërsa ka pasur edhe funksionin e dekanit të fakultetit të artit skenik në këtë akademi.
Aktori ka interpretuar në disa role në skenën e teatrit, por më i spikaturi, ai që ka lënë mbresa nga një interpretim pasional ka qenë ai në rolin e Romeos në tragjedinë “Romeo dhe Zhuljeta” të Shekspirit vënë në skenë nga Teatri Popullor në vitin 1988.
Popullaritet dhe njohje më të madhe si aktor ai mori kryesisht nga rolet e interpretuara në kinematografi ku edhe interpretoi me shumë sukses role kryesore në 17 filma artistike.
Debutimin në ekran e bëri në vitin 1976, ndërkohë që edhe ishte student, kur regjisori Kristaq Mitro i afron rolin kryesor të filmit “Nusja dhe shtetrrethimi”.
Falë paraqitjes së tij të hijshme, portretit tërheqës dhe një loje të shkëlqyer aktoriale, në vitin 1980 arrin t’i japë frymë shëmbëlltyrës së veprës heroike të Heroit të Popullit, Vasil Laçi në filmin “Plumba Perandorit”, atentatorit të perandorit Vittore Emanuel II.
Suksesi i aktorit arrin gjithashtu edhe më pas, me një interpretim brilant, kur realizon figurën e Qemal Stafës në filmin “Qortimet e vjeshtës” në vitin 1981, rol me të cilin Kastriot Çaushi fitoi edhe kupën e Festivalit të III-të të Filmit Shqiptar si aktori më i mirë për atë vit.
Afërsisht të kësaj prirjeje interpretative janë edhe dy role të tjera të rëndësishme të tij.
Arturi tek “Apasionata” (1983) dhe Iliri në “Shirat e vjeshtës” (1984). Kështu gjatë kësaj periudhe kohore Kastriot Caushi kishte arritur të japë në skene me hijeshi dhe finesë tipin e intelektualit, guximtarit të ndershëm por edhe në mes kundërshtish e dyshimesh përballë marrjes së një vendimi të vështirë.
Krejt ndryshe ndodhi me interpretimin në filmin “Dashuria e fundit” 1994 ku doli jashtë modelit të mëparshëm të një heroi, duke paraqitur në këtë film një figurë me mbartje negative dhe të rrezikshme, të pamëshirshëm si trafikant prostitutash.
Filmat më të njohur në karrierën e artistit janë
Nusja dhe shtetrrëthimi, (1976) Fatmiri
Radiostacioni, (1979) Partizani
Liri a vdekje, (1979) Anëtarë i Cetës së Cercizit
Mëngjeze të reja, (1980) Partizani
Plumba perandorit ,(1980) Vasil Laci
Agimet e stinës së madhe (1981) Gori Muzaka
Besa e kuqe, (1982) Kelmendi
Apasionata, (1983) Arturi
Shirat e vjeshtës, (1984) Iliri
Vendimi, (1984) Kujtimi
Tri ditë nga një jetë, (1986) Sandri
Flutura në kabinën time, (1988) i fejuari i Fluturës
Ngjyrat e moshës, (1990) Kristaqi
Dashuria e fundit, (1995) Trafikanti i prostitutave
Lule të kuqe, lule të zeza, (2003)
Dhimbja e dashurisë (2008) Serial
Në kërkim të kujt (2009) serial
Aktori është vlerësuar edhe me titullin “Mjeshtër i madh i punës” nga Presidenti i Republikës.
