Ish-ministri i Drejtësisë, Ylli Manjani e ka konsideruar si “alarm demokratik” vendimin e qeverisë për të për të miratuar 36 akte normative vetëm vitin që shkoi, që sipas tij janë në kundërshtim me ligjin.
“Ej, ky është alarm demokratik! Vjet qeveria nxori 36 Akte Normative me fuqinë e ligjit. Pra plot 36 herë ajo vendosi të mos zbatojë ligjet në kuadër të shtetit. 36 herë vendosi që të mos i bindet vullnetit të ligjit të popullit. Në këmbim ajo vendosi të imponojë vullnetin e saj, duke anashkaluar ligjet kuadër të vendosura nga Parlamenti, ushtruesi ekskluziv i sovranitetit të popullit”, shkruan Manjani.
Sipas tij, qeveria vendosi të përmbysë hierarkinë e të anashkalojë Kushtetutën me miratimin e tyre.
“36 herë qeveria politikisht vendosi të përmbysë hierarkinë e normave të shtetit; të anashkalojë vullnetin e sovranit, të nëpërkëmbë autoritetin kushtetues të Parlamentit. Të dërrmojë idenë e sundimit të ligjit në mënyrë të drejtë e të barabartë. Në disa prej herëve të 36-ta qeveria vendosi të dhunojë edhe liri e të drejta ligjore ndaj individëve. Vendosi të anashkalojë edhe vetë Kushtetutën”, tha ai.
Manjani shkruan se vitin që shkoi qeveria i nxori me justifikimin e pandemisë, ndërsa ngre pyetjen si do ia bëjë ketë herë. Ai thotë se këtë vit publikoi 28 akte normatike vetëm në korrik.
“Por, le të themi që vjet kishte një alibi: Pandeminë. Megjithëse edhe për të kishim ligj kuadër, por hajt më, Shqipëri hesapi dhe ta pranojmë deri diku që kishte një arsye të madhe. Po sivjet?! Deri në korrik 2021 qeveria vendosi të anashkalojë zbatimin e ligjeve kuadër të shtetit; autoritetin e Kuvendit; sovranitetin e shqiptarëve dhe sundimin e ligjit plot 28 herë!!!! 28 akte normative me masa të posaçme që shmangin buxhetin dhe hapin rrugë për abuzim me të!!! Po ta mbyllim Parlamentin se nuk u dashka më! Ti mbyllim dhe gjykatat se s’ka kuptim burgu për askënd kur qeveria nuk zbaton ligjet e parlamentit!!! Qeveria është dhunuesja më e madhe e Kushtetutës dhe ligjeve!”, shtoi ndër të tjera ish-ministri.
Në fund ai thekson se kjo është një provë që nuk qeverisemi më nga normat, por nga masat e posaçme, dhe se me këto statistika edhe parlamenti i Ugandës do ishte alarmuar.
