Trajneri i skuadrës së Juventusit, Masimiliano Allegri ka theksuar se Interi mbetet favorit për të fituar titullin kampion në Itali edhe pse Napoli me Milanin kanë bërë një nisje të shkëlqyer këtë edicion. Në lidhje me largimin e Cristiano Ronaldos ai u shpreh se janë gjëra të merkatos.
“Juventusi në këto momente nuk mund të mendojë për objektiva, më i afërti në këto momente është kalimi i turit në Ligën e Kampioneve. Të mendojmë për këtë, ose më mirë të mendojmë për Veronën e pastaj për Ligën e Kampioneve. T’i bëjmë hapat me radhë dhe pastaj të shohim se çfarë mund të bëjmë. Mendoj se Interi është favorit, por Milani dhe Napoli po bëjnë mirë dhe kanë gjithçka duhet për të fituar kampionatin. Megjithatë nuk i dihet kurrë, në futboll mundet edhe të bësh një seri prej katër ndeshjesh negative, 1 barazim e 3 humbje dhe avantazhi zhduket. Por kjo nuk na përket neve, ne mendojmë për Veronën.
Kam mësuar diçka që gjërat e thëna dhe gjëra që bëhen janë interpretime të kujtdo. Kielini ka thënë gjëra pozitive për Kristianon i cili ka qenë i jashtëzakonshëm, për mua ka qenë një nder ta drejtoj ashtu siç kam drejtuar shumë kampionë. Është normale që me 28 gusht, 3 ditë nga fundi i merkatos, nuk kishte mundësi të tjera ta zëvendësonim. Klubi u tregua i aftë të siguronte Ken i cili ka shënuar dy gola të rëndësishëm që tani dhe jam i lumtur. Nëse do të ishte larguar një muaj më parë ndoshta klubi do të kishte gjetur mundësinë që të punonte për një merkato krejtësisht ndryshe. Vetëm kaq, nuk është se Ronaldo ka një faj. Bëhet fjalë për çështje të merkatos”, shpjegoi Alegri.
