“Alfa Romeo” tek Çapja/ Merret në pyetje dhe “Rori”, Bledar Muça i bëri dhuratë servisin

Në pyetje në lidhje me mjetin ‘Alfa Romeo’ që u gjet sot në servisin në pronësi të Fejzullah Çapjas është marrë edhe një person i njohur si ‘Rori’. Gazetari Elton Qyno shkruan për OraNews se këtij të fundit, Fejzullah Çapja ia kishte lënë me qira ambientin, por muaj më vonë, ‘Rori’ ia kishte ridorëzuar dhe aktivitetin e tij e kishte shpërngulur në një tjetër pikë. Sipas Qynos, policia ka ushtruar kontroll në banesën dhe servisin tjetër të “Rorit”, por nuk është gjeyur asnjë send i paligjshëm..

Më parë kjo pronë i përkiste Bledar Muçës, i vrarë në muajin janar 2022 në Belgjikë. Muça e përdorte si servis dhe parkim për shitjen e automjeteve dhe pak muaj para se të vritej ia dhuroi këtë pronë, Fejzullah Çapjas.

Ky i fundit u shpall sot në kërkim pasi dyshohet se po përgatitej të kryente vrasje. Kjo pasi në servisin e tij në Elbasan, në lagjen “Emin Matraxhiu” i është gjetur një makinë e llojit “Alfa Romeo”, pa targa, i cili rezulton i vjedhur në Kavajë, më datë 18 prill 2019. Brenda automjetit u gjetën 2 targa, të cilat gjithashtu rezultojnë të vjedhura në Elbasan, më datë 29 qershor 2020, një kapele me stemën e Policisë, si dhe një këllëf për mbajtjen e armëve të zjarrit. Fejzullah Çapja akuzohet për veprat penale “Mbajtja pa leje e armëve, armëve shpërthyese dhe municionit”, “Mbajtja pa të drejtë e uniformës” dhe “Sigurimi i kushteve dhe i mjeteve materiale për të kryer vrasje”.