Kreu i Bashkimit Demokratik për Integrim (BDI) në Maqedoninë e Veriut, Ali Ahmeti, ka mbërritur në Tiranë për të marrë pjesë në protestën e organizuar në sheshin “Skënderbej” në mbështetje të ish-krerëve të Ushtrisë Çlirimtare të Kosovës, të cilët po përballen me drejtësinë në Gjykatën Speciale në Hagë.
Ahmeti e cilësoi këtë një ditë simbolike, ku “të gjithë jemi UÇK”, ndërsa akuzoi qarqet serbo-ruse për fabrikimin e dosjeve kundër çlirimtarëve të Kosovës.
“Ushtrisë Çlirimtare të Kosovës i bëhet një padrejtësi e madhe. Fillimisht nisi me shpifje për trafik organesh nga Dick Marty, një akuzë që nuk u provua kurrë. Tani, me të njëjtën logjikë, po tentohet njollosja e luftës sonë për liri. Kjo është e papranueshme. UÇK ka bashkëpunuar me NATO-n, SHBA-në dhe BE-në – aleatët tanë strategjikë që na ndihmuan ta fitojmë çlirimin”, tha Ahmeti.
Duke folur për domethënien e protestës në sheshin “Skënderbej”, ai u shpreh se ka ndjenja të forta emocionale dhe nostalgji, pasi aty janë frymëzuar heronjtë më të mëdhenj të Kosovës, përfshirë Adem Jasharin.
Ahmeti hodhi poshtë çdo pretendim për prapavijë politike apo partiake të protestës:
“Kjo protestë nuk ka të bëjë me partizim apo politizim. Është thirrje për drejtësi. Drejtësia duhet të flasë, por nuk mund të dënojë ata që kanë luftuar për lirinë e kombit të tyre.”
Ahmeti i bëri thirrje Gjykatës Speciale të përshpejtojë procesin dhe të shpallë sa më parë të pafajshëm Hashim Thaçin, Kadri Veselin, Jakup Krasniqin dhe Rexhep Selimin.
Procesi gjyqësor ndaj tyre ka nisur më 3 prill 2023 dhe vazhdon ende në Hagë, ndërsa një tjetër protestë e madhe është mbajtur më 14 shtator në afërsi të ndërtesës së Gjykatës Speciale, ku morën pjesë rreth 10 mijë shqiptarë nga mbarë bota.
Discussion about this post