Një kapitull i ri në përfaqësimin diplomatik të Bashkimit Evropian në Shqipëri nis këtë të mërkurë.
Sofia Moreira de Sousa zyrtarizon marrjen e detyrës si ambasadore e Bashkimit Evropian në Tiranë, duke pasuar diplomatin italian Silvio Gonzato, i cili përfundoi mandatin e tij.
Hapi i parë institucional i diplomates portugeze në Shqipëri do të jetë në Presidencën e Republikës, ku ajo do t’i dorëzojë kredencialet Presidentit Bajram Begaj.
Ceremonia shënon zyrtarisht nisjen e mandatit të saj në vendin tonë.
Moreira de Sousa vjen në këtë post me një përvojë të gjatë në diplomacinë evropiane. Përpara emërimit në Tiranë, ajo ka drejtuar Përfaqësinë e Komisionit Evropian në Portugali, ndërsa më herët ka shërbyer si ambasadore e Bashkimit Evropian në Kepin e Gjelbër.
Marrja e detyrës së saj vjen në një periudhë të rëndësishme për marrëdhëniet mes Shqipërisë dhe Bashkimit Evropian, ndërsa procesi i integrimit evropian mbetet një prej prioriteteve kryesore të vendit.
Mandati i ri pritet të shoqërohet me një vëmendje të shtuar ndaj avancimit të reformave dhe hapave të mëtejshëm të Shqipërisë drejt anëtarësimit në Bashkimin Evropian.
Karriera diplomatike
Emërimi i diplomates portugeze në Tiranë vjen pas një karriere të gjatë në institucionet europiane dhe në fushën e marrëdhënieve ndërkombëtare, ku ajo ka mbajtur disa poste të rëndësishme. Përpara ardhjes në Shqipëri, Moreira de Sousa drejtoi Përfaqësinë e Komisionit Europian në Portugali, detyrë të cilën e mori në shtator 2021.
Ajo ka shërbyer gjithashtu si ambasadore e BE-së dhe shefe e Delegacionit të Bashkimit Europian në Republikën e Kepit të Gjelbër, ku qëndroi për katër vjet. Eksperienca e saj në diplomacinë europiane shtrihet edhe në Afrikë. Më herët ka qenë zëvendëskryetare e Delegacionit të BE-së në Afrikën e Jugut, ndërsa gjatë viteve 2009-2011 ka shërbyer në Delegacionin e BE-së pranë Bashkimit Afrikan në Addis Ababa.
Në këtë periudhë, ajo është marrë me zhvillimet politike dhe proceset e integrimit rajonal në Afrikë, si dhe me partneritetin strategjik mes BE-së dhe vendeve afrikane. Karriera e Moreira de Sousës përfshin edhe angazhime në një prej periudhave më të rëndësishme të politikës së jashtme europiane.
Nga viti 2003 deri në 2007, ajo ka qenë pjesë e ekipit të Përfaqësuesit të Lartë të BE-së, Javier Solana, ku ka punuar kryesisht për marrëdhëniet e Bashkimit Europian me Rusinë dhe Ukrainën. Ajo ishte gjithashtu pjesë e përpjekjeve europiane për ndërmjetësimin e krizës politike në Ukrainë pas Revolucionit Portokalli të vitit 2004.
Në vitet 2005-2006, diplomatja portugeze ka shërbyer si këshilltare e lartë e Përfaqësuesit Special të BE-së për Kaukazin, një detyrë që e ka përfshirë në mënyrë të drejtpërdrejtë në zhvillimet politike të rajonit. Më pas, deri në vitin 2014, ajo ka qenë këshilltare e lartë e zëvendëssekretarit të Përgjithshëm të BE-së dhe pjesë e strukturave që merreshin me negociatat për çështje të lidhura me Iranin dhe marrëdhëniet e BE-së me Partnerët Lindorë. Rruga profesionale e Moreira de Sousës nuk ka nisur drejtpërdrejt në diplomaci. Në fillimet e karrierës, ajo ka punuar në departamentin e marrëdhënieve ndërkombëtare të Agjencisë Europiane të Hapësirës, ku është angazhuar në aspektet ndërkombëtare të programit satelitor Galileo.
Ajo ka drejtuar gjithashtu programe trajnimi në Akademinë e Drejtësisë Europiane në Trier të Gjermanisë, ku është marrë me përgatitjen e kurseve për gjyqtarë dhe magjistratë mbi të drejtën dhe jurisprudencën europiane. Para angazhimit në institucionet europiane, Moreira de Sousa ka ushtruar profesionin e avokates për dy vjet në një studio ligjore në Porto, qytetin e saj të lindjes. Diplomatja portugeze ka studiuar drejtësi në Portugali dhe ka përfunduar një program LLM në të Drejtën Ndërkombëtare dhe Marrëdhëniet Ndërkombëtare në Universitetin e Hamburgut, në Gjermani.
Discussion about this post