Bashkimi Europian ka paralajmëuar Qeverinë shqiptare lidhur me nismën e amnistisë fiskale, për të cilën Kryeministri Edi Rama ka paralajmëruar se do e miratojë, pavarësisht kundërshtive që jepen nga organizmat ndërkombëtare.
Nga ana e Qeverisë Rama është deklaruar se po punohet me ekspertët e BE për hartimin e nismës, por Këshilli i BE-së duket se i qëndron deri në fund qëndrimit të shfaqur më parë, duke i kërkuar Kryeministrit Edi Rama të mos miratojë nismën.
“Shqipëria duhet të shmangë çdo skemë apo masë tjetër si ligji për amnistinë fiskale dhe kriminale, e cila do të komprometonte ose minonte rreshtimin me politikat e Bashkimit Europian, duke përfshirë procedurat dhe masat e BE që synojnë parandalimin e pastrimit të parave dhe evazionit fiskal”, thuhet në një dokument të Këshillit, ku skanohet ecuria ekonomike e vendit.
Në vijim Këshilli i BE thekson se “ligji për amnistinë do të minonte gjithashtu plotësimin e kritereve të nevojshme për të nxjerrë Shqipërinë nga lista gri e pastrimit të parave”.
Në dokument, Këshilli i sugjeron qeverisë që të rrisë të ardhurat në buxhetin e shtetit përmes masave fiskale që janë miqësore me rritjen ekonomike.
Sipas raportit rritja e të ardhurave në raport me Prodhimin e Brendshëm Bruto është jetësore për të financuar rritjen e nevojshme të investimeve në drejtim të infrastrukturës dhe burimeve njerëzore.
Discussion about this post