Sfida mes Tottenham dhe Brighton e përfunduar me triumfin e vendasve me shifrat 2-1, ishte një ndeshje në të cilën nuk munguan polemikat dhe zënkat, sidomos pas një episodi në pjesën e dytë.
Teksa takimi ishte mbërthyer në rezultatin 1-1, Kaoru Mitoma pengohet në zonë nga Pierre-Emile Hojbjerg.
Një faull i dukshëm me të pranishmit që pritën vetëm ndërhyrjen e arbitrit Stuart Attwell për të akorduar 11-metërshin.
Por, arbitri kryesor vijoi lojën ndërsa vëmendja shkoi tek sistemi VAR që për habinë e të gjithëve nuk e mori në konsideratë episodin dhe nuk ndërhyri duke lënë ndeshjen të vijonte.
Ky episod bëri bujë në Angli, teksa së fundmi shefi i arbitrave në Premier League, Howard Webb e pranon gabimin e Attwell dhe i kërkon ndjesi klubit të Brighton duke theksuar se duhej të ishte akorduar penallti.
Në fakt, ky nuk është episodi i parë gjatë këtij kampionati ku skuadra e Brighton penalizohet nga vendimet e gjyqtarëve apo edhe mosndërhyrja e VAR, pasi në të kaluarën, Komiteti i Arbitrave është detyruar t’i kërkojë falje këtij klubi edhe për episodet në ndeshjen ndaj Crystal Palace në shkurt apo atë ndaj Aston Villa-s para startit të Botërorit.
Discussion about this post