Armë në këmbim të mosnjohjes së Kosovës? Deklarata e fortë e eurodeputetes

Eurodeputetja, Viola von Cramon ka komentuar takimin ndërmjet presidentit ukrainas, Volodymyr Zelensky dhe presidentit serb, Aleksandar Vuçiç.

Von Cramon tha se takimi i tyre mund të jetë zhvilluar për një marrëveshje mbi armët në këmbim që Ukraina të mos e njohë pavarësinë e Kosovës.

Këto komente eurodeputetja i bëri përmes një postimi në platformën “X”.

“Saktë! Ka shumë gjasa që Aleksandar Vuçiç ra dakord të takohet me Volodymyr Zelenskyn për të ushtruar kryesisht presion Ukrainës, armët për mosnjohjen e Kosovës.

Unë shpresoj se Zelensky e kupton se çfarë rreziku politik mund të sjellë një marrëveshje e tillë. Pavarësia e Kosovës dhe stabiliteti janë gjithashtu në interes të Ukrainës”, shkroi von Cramon.

Zelensky është takuar sot me Vuçiç në Athinë, në kuadër të një darkë joformale që e ka organizuar kryeministri grek.