Universitetet private po fitojnë terren çdo vit e më shumë në krahasim me ato shtetërore, duke u zgjedhur më tepër nga maturantët.
Sipas statistikave, numri i maturantëve të cilët zgjedhin arsimin privat këtë vit, është rritur me 3% në krahasim me vitin e shkuar akademik. Ata pohojnë se u drejtohen universiteteve private, për faktin se në aplikimet e bëra, nuk kanë fituar dot të drejtën për të studiuar në universitetet shtetërore. Kriteri i mesatares së vendosur nga ministria, i ka penalizuar maturantët, ku sipas tyre, pjesa më e madhe nuk janë përzgjedhur fitues në asnjë degë studimi. Për këtë arsye i janë drejtuar universiteteve të ndryshme private në kryeqytet. Mesatarja u vendos si kriter kryesor për maturantët të cilët do të shkonin në universitet, madje në atë kohë pati shumë kundërshtime, ku u ngritën në protesta, pasi shumë prej tyre mbetën jashtë auditorëve. Faktor tjetër i cili i bind studentët të zgjedhin privatin, është komoditeti, pasi shpesh, universitetet shtetërore kanë probleme për shkak të amortizimit.
Degët e mësuesisë mbetet ato më pak të preferuarat, ndërsa ato të ekonomisë, informatika e mjekësia shënojnë numrin më të lartë të studentëve.
