Kreu i grupit parlamentar të PS, Taulant Balla ka konfirmuar zërat se nesër zgjidhet Presidenti i ri i Republikës. Nga Fieri, Balla bëri të ditur se nesër në orën 18:00 socialistët do të bëjnë publik emrin e personit që do të zëvendësojë Ilir Metën pas përfundimit të mandatit më 24 korrik.
Pasditen e sotme në orën 17:00, Partia Socialiste do të mbledhë kryesinë e partisë për të diskutuar për Presidentin e ri. Në fakt, çështja e diskutimit për presidentit është pika e fundit e rendit të ditës në mbledhjen e kryesisë. Në fillim të mbledhjes do të diskutohet për procesin e zgjedhjes së 61 kandidatëve të PS në 61 bashki.
Pas publikimit të emrit, do të mblidhet komisioni i Ligjeve për të certifikuar kushtetueshmërinë e kandidatit e më pas, do të mblidhet seanca plenare. Në korridoret politiko-mediatike përfliten disa figura të mundshme.
Në fund të fundit, të gjithë janë të ndërgjegjshëm se kandidati është nomeklaturë personale e Edi Ramës. Që do të thotë, nuk pritet të ketë kontestime nga brenda për propozimin që do të bëjë Rama në grup. Për momentin, kandidaturat me potenciale janë Ardian Dvorani dhe Majlinda Bregu, megjithëse mund të priten surpriza.
Discussion about this post