Kryetari i Partisë Demokratike, Sali Berisha, akuzoi kryeministrin Edi Rama se për interesa personale sulmon vende partnere dhe dëmton marrëdhëniet ndërkombëtare të Shqipërisë. Gjatë një bashkëbisedimi me qytetarët në rrjetet sociale, Berisha ndaloi veçanërisht te marrëdhëniet me Gjermania, duke theksuar kontributin financiar të saj ndër vite si kusht për integrimin europian.
Ai përmendi gjithashtu një artikull të përbashkët të Rames me presidentin serb Aleksandar Vučić në të përditshmen gjermane Frankfurter Allgemeine Zeitung, duke e cilësuar këtë si rikthim te nisma e “Ballkanit të Hapur”.
“Kjo është një platformë, ky është një urdhër që Rama mori nga Aleksandër Vuçiç, padroni i tij, që ka dosjen e Ramës dhe çdo gjë për ta mbajtur siç e mban, argat. E vërteta është që edhe ajo pa të drejtë vetoje nuk është vetëm aq, por po t’i vësh re, këta kërkojnë tregun e lirë, pra Aleksandër Vuçiç kërkon Ballkanin e Hapur sepse Ballkanin e Hapur ia kundërshtoi në mënyrë të prerë BE kur u bë e qartë se ajo përfundoi në një aleancë serbo-maqedono-shqiptare, aleancë trilaterale. Dhe atëherë Edi Ramës iu tha, zgjidh këtë ose atë. Por ata kthehen prapë në vendin e krimit me këto kërkesa.
Pra shikoni se ku përfundon ëndrra shekullore e shqiptarëve me Edi Ramën. Nuk ka nevojë të kemi veto, por kemi nevojë të kemi këtë. Pra kërkon Ballkanin e Hapur. Ky është thelbi i kërkesës së tij sepse për pushtetin e tij ai është i aftë të bëjë gjithçka. Mos harroni se furtuna për Edi Rama është vetëm në fillimet e saj.
Kryengritja paqësore është në hapat e saj të para. Reagimet e fuqishme ndërkombëtare janë edhe ato në hapat e parë. Miqtë tanë, që pritëm këto ditë, na thanë se jemi të shokuar nga këto që dëgjuam dhe konstatuam në këtë vend. Ndaj Edi Rama mund të marrë çdo vendim për të shpëtuar, por i mbyturi është i pashpresë dhe ne do ta çojmë atë aty ku e meriton,” tha Berisha.
Discussion about this post