Banka e Shqipërisë ka miratuar rregulloren e cila parashikon se nga data 31 dhjetor, për të gjitha kreditë konsumatore do të ketë një tavan për interesat. Ky nivel interesi do të vendoset bazuar në mesataren e thjeshtë të normës efektive të interesit për kredinë konsumatore, duke i shtuar një të tretën e saj. Për shembull, nëse mesatarja e normave për një gjashtëmujor është 12%, tavani maksimal do të jetë 16%, duke i shtuar 1/3 e mesatares.
Ky vendim duket se prek më shumë institucionet e mikro-kredisë (institucionet jo bankare) pasi ato aplikojnë norma interesi më të larta. Një masë e tillë sipas Bankës së Shqipërisë është ndërmarrë për të mbrojtur qytetarët nga interesat e larta deri në abuzive.
Sipas rregullores së re norma maksimale e interesit do të ndahet sipas 3 shumave të kredive konsumatore. Pra për kreditë deri në 200 mijë lekë do të ketë një tavan, për ato mbi 200 deri në 2 milionë do të ketë një normë tjetër dhe për kreditë mbi 2 milionë lekë deri në 10 milionë lekë do të ketë një tjetër tavan norme interesi. Tavan për normën e interesit do të ketë edhe për bankat tregtare, por që në shpjegimet e Bankës qendrore ende nuk është specifikuar nëse do të jetë i njëjti tavan si për bankat ashtu edhe për institucionet jo-banka.
