Partizani nuk ia doli të siguronte 3 pikët ndaj Kastriotit në “Elbasan Arena”, me të kuqtë që nuk shkuan më shumë se barazimi me rrjeta të paprekura.
Një barazim që kënaq më shumë Tiranën e cila afrohet tashmë me vendin e parë që mbahet nga demat me vetëm 1 pikë.
Pas kësaj pike të fituar, trajneri Giovanni Colella ka theksuar se skuadra e tij luajti mirë, ndërsa ndjen keqardhje për rastet e humbura.
“Gotën e shoh gjysëm. Këtë rezultat s’e shoh as gjysëm pozitiv, as gjysëm negativ. Mendoj që kemi bërë një ndeshje mjaft të mirë. Kemi pasur raste më shumë se në ndeshjet e tjera. Ky është futbolli. Ke shumë raste për të shënuar, nuk fiton.
Skuadra? Nuk mund të them që kemi bërë një ndeshje të keqe, por as të mirë. Sigurisht e vetmja keqardhje që kam është se nuk kemi mbajtur ritmin. Sigurisht kjo edhe për meritë të kundërshtarit.
Skuka? E vetmja keqardhje që kam është se kemi pasur shumë raste dhe nuk i kemi konkretizuar me gol. Gjëja pozitive është se vazhdojmë të jemi në vend të parë dhe do të vazhdojmë. Duhet të kemi kujdes kur luajmë me kundërshtarë të tillë. Nuk jemi të varur nga golat e Skukës.
Lëvizja me Hotin? Të gjitha lëvizjet që bëra me Vllazninë dhe askush s’më pyeti për këtë siç bëra sot. (Qesh). Thjesht sepse doja të krijoja sa më shumë hapësira, ndaj e bëra këtë lëvizje.
Cara – Skuka – Da Silva – Hoti? Të gjitha skuadrat po luajnë çdo 3 ditë. Arsyeja është se pse bëj këto lëvizje, më duhet të menaxhoj gjendjen e lojtarëve nga ana fizike. Në këtë moment të kampionatit që gjendemi duhet të menaxhoj gjendjen e tyre. Ndeshjet janë shumë afër. Duhet të shikoj gjendjen e tyre në fushë. Hoti në këto dy muaj, ka pësuar 3 dëmtime. Da Silva ka problemet e tij fizike. Nuk janë pra në 100 përqindëshin e tyre. Nuk është se kemi shumë kohë për t’u stërvitur, ndeshjet vijnë shumë shpejt”, tha ai.
Discussion about this post