Barcelona i falet Pedrit e Torres në takimin përballë Cadiz

Barcelona ka lënë pas zhgënjimin dhe acarimin e barazimit në javën e parë në La Liga, duke siguruar sot fitoren e parë në në këtë edicion.

Blaugranat kanë mundur me shifrat 2-0 Cadizin, jo pa vështirësi për të gjetur rrugën e rrjetës, teksa kanë zgjidhur takimin vetëm në fundin e tij.

Barcelona ka dominuar plotësisht sfidën, duke krijuar raste të njëpasnjëshme para portës së Ledesma, i cili ia doli që të mbante të paprekur rrjetën e katërkëndorit të tij në këtë duel deri në minutat e fundit.

Aty u desh një pasim gjenial i Gündogan për Pedrin, i cili nuk gaboi para portës në minutën e 82-të, duke i dhënë avantazhin ekipit të tij.

Në fund, ishte Ferran Torres, ai që vulosi fitoren 2-0 për ekipin katalanas, duke shmangur problemet për Xavin i cili kishte filluar të përballej me kritika pas startit të dobët të kampionatit.