Një përplasje e ashpër u regjistrua në seancën plenare të Kuvendit mes kreut të Grupit Parlamentar të Partisë Demokratike, Gazment Bardhi dhe ministrit të Kulturës, Blendi Gonxhja, lidhur me koncertin e reperit amerikan Kanye West, i planifikuar të mbahet më 11 korrik në Tiranë.
Gjatë fjalës së tij, deputeti i kërkoi qeverisë të anulonte koncertin, duke e lidhur kërkesën me qëndrimet e artistit. Bardhi e quajti Gonxhen, “hajdut i certifikuar.”
“Na flisni ju për antisemitizëm? Po anuloni koncertin e Kanye West. A i është anuluar koncerti këtij në çdo vend për shkak të qëndrimeve që ai mban? Ti je një hajdut i certifikuar. Anuloni ju koncertin dhe pastaj hajde flisni për antisemitizëm!”, tha Bardhi.
Pas kësaj deklarate, kryetari i Kuvendit, Niko Peleshi, ndërhyri duke i tërhequr vëmendjen deputetit demokrat për gjuhën e përdorur në sallë.
Ministri i Kulturës, Blendi Gonxhja, iu përgjigj akuzave të Bardhit duke mbrojtur organizimin e koncertit dhe duke e cilësuar atë si një ngjarje me rëndësi për promovimin ndërkombëtar të Shqipërisë.
“T’i marrin të keqen Kanye West! Është super artist që ka performuar në Holandë dy net, një vend lider i BE që ka koncert në Spanjë, Portugali, ka bërë koncert në Turqi, Gjeorgji, SHBA e së shpejti në Shqipëri. Ata që kanë ndonjë gjë me koncertin, na vjen keq, do të jetë një nga eventet që na fut në ligën e ndërkombëtarëve sa i përket destinacionit e brand-it”, u shpreh Gonxhja.
Discussion about this post