Kryetari i Grupit Parlamentar të PD, Gazment Bardhi ka kërkuar nga ministrja e Brendshme Albana Koçiu që të japë sqarim për dhunën policore në protestën e opozitës të 24 janarit.
Në fjalën e tij në Parlament, Bardhi akuzoi Drejtorin e Policisë së Shtetit, Ilir Proda si të lidhur me bandat kriminale.
Bardhi ngriti edhe shqetësimin e përdorimit në protestën të gazit lotsjellës nga ana e policisë, që rezultoi të ishte i skaduar.
“Kërkesa që paraqiti kolegu Blushi është në përputhje me nenin 31 dhe nuk ka nevojë me shkrim; mjafton ta paraqesë një grup parlamentar edhe në seancë dhe mbështetet me ngritjen në këmbë të deputetëve, që ministrja e Brendshme të japë llogari për dhunën policore ndaj qytetarëve të pafajshëm, nga policia e drejtuar nga një kryekriminel si Ilir Proda, një ushtar i Suel Çelës dhe klanit të Troplinëve.
Kjo është një kërkesë procedurale që ju duhet ta hidhni në votim. Duhet të japë shpjegim për përdorimin e lëndëve të skaduara, sepse edhe sot që flasim kemi probleme me frymëmarrjen për shkak të një akti kriminal të policisë, drejtuar nga zonja. Edhe pse i kanë thënë të merret me zjarrfikëset, se Ilir Proda është përgjegjës sa i takon policisë. Është krimi i organizuar mbi të, por kjo është një kërkesë që ju duhet ta hidhni në votim.
Sa i takon kërkesës së tyre, nuk ka bazë ligjore. Nëse duhet të hiqet nga rendi i ditës, sepse propozimi i tyre është ky, do të duhet të hiqet Kodi Penal, ku të gjitha shoqatat dhe organizatat në mbrojtje të gazetarëve janë kundër. Duhet hequr ligji për lobimin, duhet hequr ligji për shitjen e armëve dhe duhet hequr ligji që ngushton hapësirën për komisionet hetimore, një e drejtë kushtetuese e opozitës”, u shpreh Bardhi
Discussion about this post