Ka përfunduar takimi informal i thirrur nga Kryetari i Kuvendit, Niko Peleshi, me krerët e grupeve parlamentare opozitare, ku pjesë e diskutimit ishte përfaqësimi i Shqipërisë në organizatat ndërkombëtare dhe ngërçi në Kuvend.
Pas takimit, Gazment Bardhi deklaroi se qëllimi ishte konsultimi për delegacionet e përhershme në organizatat ndërkombëtare, siç e parashikon Rregullorja e Kuvendit. Ai theksoi rëndësinë e përfaqësimit në Asamblenë Parlamentare të Këshillit të Europës, e cila mblidhet më 29 shtator.
“Ky proces duhet të ecë një orë e më parë për të akredituar delegacionin e Parlamentit Shqiptar. Ne kemi dhënë vlerësimet tona për përfaqësimin e opozitës dhe asnjëherë opozita nuk ka munguar në këto takime institucionale”, tha Bardhi.
Ai konfirmoi se emrat për komisionet parlamentare janë depozituar zyrtarisht dhe theksoi se opozita nuk do të lejojë që Kuvendi të funksionojë si një institucion i kontrolluar nga Edi Rama:
“Nuk mund të kemi opozitë të vdekur në Parlament. Nëse shkelet Rregullorja, opozita do të reagojë.”
I pyetur për mundësinë e një normalizimi të jetës parlamentare, Bardhi u shpreh se sjellja e opozitës do të varet nga respektimi i rregullave nga mazhoranca. Ai mohoi që në këtë takim të jetë diskutuar për mocionin për shkarkimin e Peleshit.
Për sa i përket deklaratave të Ramës për sjelljen e opozitës në seanca, Bardhi u përgjigj prerë:
“Nuk marrim udhëzime nga Rama. Këto i jep në grupin e vet, jo në Kuvend. Opozita vendos vetë.”
Discussion about this post