Kryetari i PD, Lulzim Basha i shoqëruar nga grupi parlamentar i PD, është nisur drejt Parlamentit për nisjen e seancës së parë plenare. PD kthehet në Kuvend, 30 muaj pasi braktisi mandatet në shkurt 2019.
Sot, 140 deputetët e dalë nga zgjedhjet e 25 Prillit, nga ku 74 PS, 59 PD, 4 LSI dhe 3 PSD, do të ulen në sallën e Kuvendit për të shënuar nisjen zyrtarisht të kësaj legjislature.
Rregullorja e Kuvendit përcakton se drejtues i seancës së parë plenare është deputeti më i vjetër në moshë, deri në zgjedhjen e Kryetarit të Kuvendit. Këtë përgjegjësi do e ketë deputetja e PS-së Luljeta Bozo.
Seanca e parë pritet të ketë më së shumti një atmosferë formale, ku do të nisë procesi i verifikimit të mandateve të ligjvënësve dhe betimit të tyre. Kjo do të jetë seanca e parë, pas të cilës do të thërritet një e dytë, në të cilën do të votohet kryetari i ri i Kuvendit. Gijotina.com, njoftoi më herët se seanca e dytë do të nisë në orën 17:00.
Surprizat këtë seancë i rezervoi PD, ku ditën e enjte, Lulzim Basha deklaroi se Sali Berisha nuk do të jetë pjesë e grupit parlamentar të PD-së, deri në zbardhjen e plotë të vendimit të DASH, e ku të sqarohet e gjithë e vërteta.
Basha tha se “Partia Demokratike është partia më pro-amerikane dhe më pro-europiane dhe ky vendim do të shmang keqpërdorimin e çështjes nga kushdo, për të dëmtuar interesin e demokratëve dhe Partisë Demokratike, dhe do i hiqte alibinë cilitdo për të mbrojtur të keqen e vetme të Shqipërisë që është keqqeverisja dhe korrupsioni 8 vjeçar i Edi Ramës”.
Në mbledhjen e grupit parlamentar që zgjati deri në orët e vona të mbrëmjes, mësohet se Basha mbajti përgjegjësinë për vete duke deklaruar se nuk do e kalojë në votim, me pretekstin se partia demokratike do të përçahet.
Berisha pas këtij veprimi të Bashës ka deklaruar se nuk do të krijoj një grup të ri, por do të vazhdoj betejën për të rikthyer sovranitetin e PD. Madje, në daljen e tij për media, ai ka artikuluar dhe dorëheqjen e liderit të sotëm të opozitës, duke u shprehur se duhet të kishte dhënë dorëheqjen pesë herë para se të vriste sovranitetin e PD.
