Në një konferencë për mediat kreu i PD, Lulzim Basha ka reaguar në lidhje me deklaratat e kryeministrit Edi Rama, ku shpalli krizën energjetike. Basha tha se ajo që prezanton Rama nuk është krizë energjetike, por korrupsioni dhe keqmenaxhimi.
Nga ana tjetër, Basha ka hedh akuza ndaj Ramës se po blenë energjinë elektrike me çmim 10 herë më shtrenjtë se sa çmimi në bursë. Basha tha se për të njëjtën sasi energjie duhej të paguheshin 29 mln euro, por në fakt, sipas tij, janë paguar 39 mln euro.
“Kur tellalli i të keqes doli për të nxitur frikë dhe ankth, qëllimi i tij i vërtetë është krijimi i kushteve të presionit për atë që ai planifikon të bëjë për rritjen e çmimit të energjisë elektrike. Sot e patë se si përdridhej para gazetarëve, si një avokat i klientëve me të cilëve po ndante Shqipërinë si plaçkë. Nuk ka asnjë të përbashkët mes asaj që ndodh në Evropë e krizës së përkohshme në Shqipëri. Ne jemi mësuar tashmë për t’i qarë hallin G7-s për t’i krahasuar vendet më të fuqishme me vendin më të varfër të Evropës. Për t’ju gënjyer dhe për të bërë të duket sikur rritja e çmimeve qenka e pashmangshme, në fakt nuk është kështu, kjo nuk është një krizë energjitike, kjo ëhstë krizë korrupsioni me shkak e me plan“, tha Basha.
Kreu i opozitës tha se vetëm për rryshfet shqiptarët paguajnë rreth 500 milionë euro në vit, dhe renditemi të dytët në botë, ku na e kalon vetëm një shtet si Zambia.
Kryedemokrati theksoi se përgjegjësi i vetëm i gjendjes së keqe ekonomike në Shqipërisë është kryeministri Rama dhe se me vendimet e tij të gabuara kriminale kërkon të merret me batuta, vetëm për të larguar vëmendjen nga situata në të cilën ndodhet vendi.
“I keni parë bilancet se si në verë shesin energji elektrike dhe pak muaj më vonë e blejnë me 3 ose 4-fishin e çmimit duke shpërdoruar taksat që ua mbledhin kacidhe më kacidhe shqiptarëve. OSHEE dhe KESH janë ndërmarrje të zhytura në korrupsion, militantë partie që nuk i shërbejnë interesit të qytetarëve. Mjaftojnë raportimet e fundit në media për t’i çjerrë maskën atyre ku shihet se çmimi i blerjes së energjisë është shumë më i lartë se çmimi në bursa. Për tre tenderat e fundit është 10 milionë euro boshllëk, mes çmimit të tregut dhe atij që paguajnë këta kur e blejnë energjinë. Duhet të paguheshin 29 mln euro dhe janë paguar 39. Në fakt nuk duheshin bërë fare ato tendera, nuk duhej blerë ajo energji elektrike në këto kohë nëse nuk do ishte shitur për dy aspra energjia elektrike ne verë‘, tha më tej Basha.
