Sulmuesi i Kombëtares shqiptare, Myrto Uzuni dhe mbrojtësi i Hungarisë Endre Botka, të dy lojtarë të Ferencvarosit janë intervistuar nga mediat hungareze.
Duke folur për këtë përballje lojtari ‘Kuqezi’ është shprehur se si dy shokë ata bëjnë gjithmonë shaka, por në këtë rast nuk do të ndodhë, pasi sipas tij nuk mund të bëhet ajo gjë me ndeshjet e Kombëtareve.
“Kemi shumë duele të bukura, por e ruajmë njëri-tjetrin. Endre është një mbrojtës shumë i mirë. Ka një zemër të madhe, lufton deri në fund. Mentaliteti i tij është si i imi, ai nuk dorëzohet kurrë. Bëjmë shumë humor dhe shaka me njëri-tjetrin, por në futboll nuk bëhet shaka, sidomos me skuadrat kombëtare. Ne ishim më mirë në Elbasan dhe morëm 3 pikët. Nuk do të ishte e drejtë që të bëja humor. I ruajtëm për vete të gjitha ndjesitë e kësaj sfide”,– u shpreh Uzuni.
Në lidhje me mungesën e tifozëve, shqiptari shton: “Më vjen keq që nuk do të ketë tifozë. Realisht më vjen. Do të ishte një atmosferë e jashtëzakonshme në ‘Puskas Arena’. Është bukur të luash futboll në atë atmosferë. Do të ishte diçka interesante. Të motivon të vraposh. Nuk kemi ndonjë avantazh të madh që nuk ka tifozë”.
Myrto Uzuni është shprehur i sigurt se vendin e dytë në grup pas Anglisë do e marrë Shqipëria, pasi sipas sulmuesit Polonia dhe Hungaria qëndrojnë pas nesh.
“Ne të gjithë lojtarët besojmë. Jemi pas Anglisë dhe na ndjekin Polonia me Hungarinë. Nuk po them që do të jetë e lehtë për të arritur vendin e dytë, por nuk është e pamundur. Kemi një ekip të mirë dhe me futbollistë që luajnë në kampionate shumë të forta. Shqiptarët nuk dorëzohen kurrë”,-theksoi ylli i skuadrës së Ferencvarosit.
Theksojmë se kjo do të jetë një sfidë e veçantë për të pasi do të përballet me përfaqësuesen e shtetit, të cilit i përket klubi ku ai aktivizohet./K.T/Gijotina.com
