Kryetari i PD, Lulzim Basha ka takuar të rinjtë e Partisë Popullore Austriake, ku ka postuar dhe një status në “Facebook”. Në shkrimin e tij, përmend dhe të rinjtë shqiptarë, të cilët i vlerëson për arritjet e tyre nëpër botë.
“Jam krenar për të rinjtë shqiptarë që me aftësi dhe mençuri, shkëlqejnë në universitetet më të mira në botë, ndaj detyra për të cilën mbetem thellësisht i angazhuar, është të bëjmë gjithçka për t’i dhënë mundësinë kujtdo që dëshiron të arsimohet dhe të këtë mundësi të përparojë në jetë”, pohon kryedemokrati.
Me të pranishmit, Basha ka bërë me dije prioritetin e PD që është anëtarësimi i Shqipërisë në BE, për t’u dhënë edhe të rinjve tanë shanse dhe mundësi të barabarta me bashkëmoshatarët e tyre europianë. Ndërkohë, pavarësisht qëndrimit në opozitë Basha është shprehur edhe për fenomenin e emigrimit e largimit të të rinjve.
“Edhe pse në opozitë, ne do të bëjmë gjithçka për të rinjtë që sot fatkeqësisht shohin emigrimin si të vetmen zgjidhje”, shkruan Basha.
Kryedemokrati garanton të rinjtë se do luftojë për të siguruar një të ardhme për ta.
Ndër të tjera shkruan se me mbështetjen e partnerëve do t’u mundësojë të rejave dhe të rinjve, të jetësojnë potencialin e tyre.
