Grupi Parlamentar që mbështet Enkelejd Alibeajn nuk është dakord me propozimin e mazhorancës për Presidentin e Republikës. Gjeneral Bajram Begaj është një emër që ka dalë nga xhepi i Edi Ramës, shkruhet në reagimin në rrjetin social “Facebook”.
“Asnjë surprizë nga procesi personal i Edi Ramës për zgjedhjen e Presidentit të Republikës. Ai nxori sot nga xhepi zarfin me emrin e kandidatit të paracaktuar nga mafia e pronave shtetërore. Grupi Parlamentar i Partisë Demokratike kishte paralajmëruar se Edi Rama i ka farsë përbetimet për President konsensual dhe gjithëpërfshirës. Moslegjitimi i kësaj farse të paralajmëruar nga ana jonë, qoftë edhe me votë kundër, është detyrë e çdo deputeti të Opozitës.Pjesëmarrja në votim nënkupton që t’i japësh fytyrën e normalitetit demokratik regjimit të Edi Ramës, ndërkohë që ai po ndërmerr një akt tjetër personal për të asgjësuar një tjetër institucion kushtetues të pavarur” – shkruan Alibeaj.
Kështu Alibeaj njofton se nuk do të jetë nesër në seancën ku do të votohet Presidenti i ri.
“PD nuk mund të jetë në seancë si fasadë për të legjitimuar kapjen e institucionit të Presidentit, as dëshmitare e atij procesi, sa kohë rezultati i votimit dihet. PD nuk mund të votojë një President që del nga xhepi i Edi Ramës, jashtë një procesi gjithëpërfshirës dhe transparent”. Të gjithë procesin e zgjedhjes së Presidentit, Alibeaj e ka cilësuar si një farsë të mazhorancës. Kështu, Alibeaj nuk dha asnjë propozim në raundin e dytë dhe të tretë të procesit, ku mazhoranca vetë nuk bëri asnjë propozim dhe si arsyetim tha se “mazhoranca me në krye Edi Ramën prishi marrëveshjen për të cilën u ra dakord në fillim” – shkruan Alibeaj.
Discussion about this post