Kandidati i Alibeajt për bashkinë e Tiranës në zgjedhjet e 14 majit, Roland Bejko në një takim me banorë në zonën e Kinostudios, foli për programin e PD-së për transportin publik. Bejko tha se do të ofrojnë një transport publik të aksesueshëm për të gjithë qytetarët duke mundësuar lëvizjen falas për të gjithë kategoritë që nuk kanë mundësi financiare, duke nisur nga pensionistët, studentët, të papunët, njerëz me aftësi ndryshe dhe ish-të përndjekurit politikë.
Bejko premtoi biletë elektronike, që do të jetë e vlefshme për 1 javë, 1 muaj ose edhe vjetore. Kjo risi, tha Bejko, do të eliminojë radhët e gjata për t’u pajisur me abone, pasi qytetarët do të mund t’i blejnë ato online.
“Erion Veliaj ka katërfishuar-pesëfishuar taksat e qytetarëve, ne do t’i përgjysmojmë. Ka krijuar kaos në trafikun urban, se nuk ushtron kontroll ndaj kompanisë që e ka marrë këtë koncesion. Pse nuk ushtron kontroll? Ne dyshojmë se ka korrupsion, por të mos kishte korrupsion do ushtronte kontroll, do ta kontrollonte me sistem elektronik që nga zyrat e bashkisë. Sistemin urban të transportit të qytetarëve do e kishte bërë siç e ka gjithë bota me një sistem elektronik, ku qytetarët s’do rrinin në radhë për një abone, as pensionistët, as të papunët. Do të kishin një biletë që do u mundësonte qytetarëve të lëviznin me biletë javore, mujore dhe vjetore. Ne këtë do të bëjmë”, tha ai.
Bejko tha se do të ndërtohen 5 qendra polifunksionale në hyrje dhe dalje të Tiranës, të cilat do të jenë me parking mbi dhe nëntokësor. Ai u shpreh se kjo do të ulë trafikun në Tiranë, pasi qytetarët që vijnë nga qytete të tjerë, do të parkojnë mjetet në këto qendra dhe do të shkojnë drejt qendrës së Tiranës me linjat e transportit urban ose me autobusë ekspres. Qytetarët që do të parkojnë mjetin në këto qendra, do paguajnë një biletë me vlerë 2 euro, e cila më pas do të jetë e vlefshme për të lëvizur në linjat e transportit urban gjatë gjithë ditës në Tiranë.
“Ne propozojmë që në hyrje të Tiranës në të gjitha arteriet kryesore, në rrugët kryesore, që vijojnë nga rrugët që vijnë në drejtim të Tiranës nga e gjithë Shqipëria, krahu i rrugës së Durrësit, Kavajës, Elbasanit, Arbrit e kështu me radhë do ndërtohen 5 parkime mbi dhe nëntokësor të mëdha, do të shërbejnë për parkimin e mjeteve që vijnë nga rrethet. Aty qytetarët do kenë mundësi të marrin transportin publik, kush të dojë mund të ecë me autobusë urban, të tjerët do të kenë alternativë edhe autobusë ekspres, të cilët do ta sjellin pa ndalesë nga periferia në qendër, dhe nga qendra në periferinë tjetër të Tiranës, me dy ndalesa, siç e ka gjithë bota”, tha Bejko.
Discussion about this post