Florentino Perez nuk i ndal elozhet për Topin e Artë 2022, Karim Benzema. Presidenti i Real Madrid, në një intervistë për El Larguero, ka folur për sulmuesin francez e jo vetëm. Spanjolli analizoi formën e skuadrës e shpërfilli Kylian Mbappé dhe Erling Haaland. Perez madje zbuloi se kush mund të fitojë çmimin e lakmuar të France Football në të ardhmen.
Në Teatrin Chatêlet në Paris, Karim Benzema fitoi Topin e Artë të parë në karrierë. Një arritje e madhe për francezin, që entuziazmoi edhe presidentin merengues: “Benzema e meritonte Topin e Artë prej vitesh. Jam i lumtur sepse më në fund Karim ka meritën e të qenit lojtari më i mirë në botë, gjë që e ka pasur prej vitesh. E meritonte prej kohësh sepse ishte më i miri për tre apo katër vjet. Është një 9, që është një përzierje mes Ronaldo Nazarios dhe Zinedine Zidane. Ai është një 9 që i bën ato dy punë në të njëjtën kohë. Ai nxit manovrën sulmuese siç bënte Zidane dhe e sheh portën ashtu siç bënte Ronaldo Nazario”.
Benzema ishte Topi i Artë, Thibaut Courtois mori Trofeun Yashin, por Reali nuk arrin të marrë çmimin Klubi i Vitit. Ky trofe cuditërisht shkoi për Manchester City: “I përgëzoj. Ata kanë një president të madh, një trajner të madh, shumë lojtarë të mirë. Është e vërtetë që ata janë një klub i madh. Unë njoh shumë njerëz atje dhe mendoj se janë gjithashtu të denjë për atë çmim. Nuk ka nevojë për të shtuar, por”.
Të pashmangshme pyetjet për Mbappé dhe Haaland. Florentino Perez, megjithatë, i shpërfilli dy lojtarët. Reali tashmë ka profesionistë të shkëlqyer dhe dy prej tyre mund të jenë fitues të ardhshëm të Topit të Artë: “Debati për Mbappé? As nuk e kisha lexuar. Tashmë kemi kaluar një verë të mirë, kështu që nuk bëhet fjalë. Asgjë nuk mund të dihet për të ardhmen, por lojtarët e Real Madrid po përparojnë në mënyrë spektakolare. Rodrygo dhe Vinicius kanë ende një jetë për të lulëzuar. Të dy i shoh si Topa të Artë. Reali shikon vetëm lojtarët që ka dhe ne jemi të kënaqur. Kemi një të ardhme shumë premtuese. Klauzola e ç’lirimit të Haaland? Unë nuk kam asnjë ide. Tashmë ne i kemi lojtarët më të mirë”.
Discussion about this post