Drejtori i Autoritetit Rrugor Shqiptar, Evis Berberi nuk përmbahet duke lëshuar qindra miliona lekë për shërbime të shtrenjta. Këto ditë i është vënë me vrull abuzimeve për aksin Elbasan – Qafë- Thanë.
Rruga prej floriri
Kujtojmë se më 5 qershor 2023 është publikuar finalizimi i prokurimit me objekt “Zgjerimi i rrugës Elbasan – Qafe – Thanë (Faza II)”. Për këtë tender janë lënë në dispozicion 24 miliardë lekë dhe fituesi do ketë mundësi të vjelë para për 2 vite rresht. Sigurisht u sulën të gjithë ujqërit e tenderëve pasi bëhet fjalë për vetëm 3.8 km rrugë.
Ju kujtoni se ky segment do të shtrohet me flori dhe sinjalistika do të jetë me diamante! Janw mbi 6 miliardë lekë investime për 1 km! Megjithëse tenderi shpallet për zgjerim, projekti nuk shton asnjë centimetër në gjerësinë e rrugës që aktualisht është në standardet e rrugës interurbane 10.25 m.
Ky segment rrugor prej 3840 m nis në fshatin Mirakë dhe përfundon 600 m para urës së Murrashit, duke kaluar në një aks të ri. Devijimi nga aksi ekzistues bëhet për të plotësuar parametrat teknike të kategorisë B, por në pjesën fundore të segmentit është ruajtur e paprekur rruga ekzistuese. Pra, mos prisni që Berberi të ndërtojë autostradë, por thjesht do ta lërë rrugën siç është dhe do vërë ca vizime të reja. Kryeministrit do t’i çojnë një video për në Facebook dhe ja ‘rruga e re”!
Projekti ka edhe një paralajmërim të errët mbi fatin e këtyre parave të derdhura lumë anës Shkumbinit.
Sipas dokumentit të mësipërm, Nuk do të hidhet asfalto beton, madje nuk të ndërtohen rrugët sekondare. Po për çfarë dreqin harxhohen këto 24 miliardë lekë?! Pyetja është retorike. Theksojmë se tenderi është dhënë pa garë dhe është shënuar me “Flamur të kuq” nga monitoruesi Open Data. Kjo shenjë vendoset për shkak të riskut të lartë të korrupsionit për fondin e prokuruar nga Evis Berberi.
Dy ofertat më ekonomike u skualifikuan dhe u pranua më e shtrenjta. Fitues i këtij fondi të madh u shpall bashkimi i kompanive “4 A-M & ARKONSTUDIO & ELMAZAJ KONSTRUKSION & AGRI
CONTRUCTION”. Pronarët e tyre respektivisht Ardit Metaliaj, Shkëlqim Elmazaj, Petrit Patushi fituan super tenderin me ofertën: 2,424,620,747.00 lekë, që e paska joshur Berberin. Oferta është mbi 3 miliardë lekë më e shtrenjtë se të tjerat. Të shohim se si do ta justifikojë këtë Berberi para KLSH-së dhe SPAK-ut.
Supervizioni që kushton sa qimet e kokës
Pasi dha këto miliarda lekë, Berberi po planifikon një tjetër shpenzim në emër të kësaj rruge. Tani do të hidhen edhe 500 milionë lekë të tjera për studiot që do të mbikëqyrin punimet. Konkretisht, në listën e projekteve të parashikuara për prokurim, Autoriteti Rrugor Shqiptar ka publikuar dy tenderë me objekt “Supervizion punimesh Zgjerimi i rrugës Elbasan – Qafe – Thane (Faza III)” dhe tjetri është për fazën IV. Pavarësisht hapësirës dhe terrenit të ndryshëm, për secilin parashikohet të shpenzohen 250 milionë lekë.
Të dy tenderët janë publikuar më datë 19 shtator 2023 dhe pritet që të zhvillohen në dhjetor. Kështu viti 2024 do të nisë me një dhuratë të majme për ndonjë nga miqtë e Berberit.
Ndërkohë duhet të shtojmë se këto fonde janë vetëm një pjesë e “investimit” që po kryhet për këtë rrugë. Në muajin qershor 2023, përveç 24 miliardë lekëshit për zgjerimin e rrugës, u dhanë edhe 200 milionë lekë të tjera për supervizmin e punimeve në fazën II. Kështu për të gjitha fazat fondi sa vjen e shtohet.
Për supervizionin e fazës II fitoi pa garë oferta më e shtrenjtë e paraqitur nga operatorët TRANSPORT HIGHWAY CONSULTING” & “HE & SK 11”.
Aferat e drejtorit Evis Berberi
Berberi është mësuar që të menaxhojë abuzime të mëdha duke postuar sipër fonde në llogaritë e oligarkëve.
Në vitin e shkuar, plasi skandali i ARRSH-së me tenderin 1,18 miliardë lekë ose 9,7 milionë euro për rikonstruksionin e aksit 19 kilometër të gjatë Maliq-Lozhan në Ristrelcë, ku fituese është shpallur kompania “Gjikuria” me një ofertë sa 98,4% e fondit limit.
Ishin 4 kompani që bënë ofertën më të mirë duke ofruar më pak para për ta bërë këtë rrugë, por ARRSH-ja e Evis Berberit i skualifikoi, duke përdorur një sërë justifikimesh.
Gjithashtu, në fund të muajit maj 2022, për mirëmbajtjen e rrugëve të Korçës është shpallur fituese kompania e vetme e paraqitur “2T” sh.p.k.
Në pronësi të Dritan Troskit dhe Artan Dakos me një vlerë prej hiç më pak se 99.9% e fondit limit. Haptazi, ky tender futet në kategorinë e atyre që shënohen me “Flamur të kuq” për shkak të korrupsionit.
Ngjashëm ka ndodhur edhe me lotin 8 të segmentit “Kardhiq-Delvinë”, ku është shpallur fituese kompania “GENER 2”, me 99.7% të fondit limit, në vlerën e 12 milionë eurove.
Ky drejtor nuk shqetësohet më as t’i rregullojë letrat e tenderëve, por u ka hyrë me kokë abuzimeve, kështu që SPAK-u nuk do të lodhet të mbushë dosjen e tij për në burg.
Lexo edhe: Sherri për tenderin 860 MLN lekë, Berberi pajton nipin e Sadri Abazit me Salillarin
Discussion about this post